കോട്ടയം : കോട്ടയത്തിനു ഓണസമ്മാനമായി നവീകരിച്ച കെഎസ്ആര്ടിസി കോട്ടയം ബസ് ടെര്മിനല് തുറന്ന് കൊടുക്കുന്നു. തിരുവഞ്ചൂര് രാധാകൃഷ്ണന് എംഎല്എയുടെ ആസ്തി വികസന ഫണ്ടില്നിന്ന് അനുവദിച്ച രണ്ട് കോടി രൂപ മുടക്കിയാണു ബസ് ടെര്മിനല് നിര്മിക്കുന്നത്. രാത്രി യാത്രികര്ക്കു വിശ്രമിക്കുന്നതിനുള്ള സൗകര്യം ജീവനക്കാര്ക്കുള്ള വിശ്രമമുറി, പുരുഷന്മാര്ക്കും സ്ത്രീകള്ക്കും ആധുനിക ടോയ്ലറ്റ് സംവിധാനം, അധുനിക റിസര്വേഷന് കൗണ്ടര്, പോലീസ് എയ്ഡ് പോസ്റ്റ്, യാത്രക്കാര്ക്ക് ഉന്നത നിലവാരത്തിലുള്ള ഇരിപ്പിടങ്ങള് എന്നീ സൗകര്യങ്ങള് പുതിയ ടെര്മിനലില് ഒരുക്കിയിട്ടുണ്ട്. ഏറെനാളായി ചെളിക്കുഴിയായി കിടന്ന കെഎസ്ആര്ടിസി ബസ് സ്റ്റാന്ഡ് തിരുവഞ്ചൂര് രാധാകൃഷ്ണന് എംഎല്എ മുന്കൈയെടുത്താണു ആധുനിക നിലവാരത്തില് കെട്ടിട നിര്മാണം നടത്തിയത്.
കെട്ടിടനിര്മാണം പൂര്ത്തിയായെങ്കിലും ചുറ്റുമുള്ള സ്ഥലങ്ങള് ഇന്റര് ലോക്ക് ഇഷ്ടികകള് പാകുന്ന നടപടികള് പുരോഗമിക്കുകയാണ്. പെയിന്റിംഗ് ജോലികളും നടന്നുവരുന്നു. ഒരേസമയം 10 ബസുകള് നിരനിരയായി ടെര്മിനലിന്റെ മുമ്പില് പാര്ക്ക് ചെയ്യാന് കഴിയുന്ന വിധത്തിലാണ് നിര്മാണം. സ്റ്റാന്ഡിലെത്തുന്ന മറ്റ് ബസുകളുടെ പാര്ക്കിംഗ് ടെര്മിനലിന്റെ മറുവശത്താണ്. പുറപ്പെടുന്ന ബസുകള് മാത്രമാണ് ടെര്മിനലിന്റെ മുമ്പില് എത്തുക.
യാത്രക്കാര്ക്ക് ടെര്മിനലില്നിന്നുകൊണ്ട് ബസിന്റെ ബോര്ഡ് നോക്കി ബസില് കയറാന് കഴിയുന്ന വിധത്തിലാണു ക്രമീകരണം. ടെര്മിനലിന്റെ നിര്മാണം പൂര്ത്തീകരിക്കുന്നതോടെ തിയറ്റര് റോഡ് പൊളിച്ചു വീതി കൂട്ടി യാത്രക്കാര്ക്ക് മറുവശത്ത് കൂടിയും ടെര്മിനലില് പ്രവേശിക്കാന് കഴിയും. ഈ ഭാഗത്ത് ഷോപ്പുകള് നിര്മിച്ചു കെഎസ്ആര്ടിസിക്കു മറ്റൊരു വരുമാനംകൂടി ലഭ്യമാക്കാന് കഴിയുമെന്നും തിരുവഞ്ചൂര് രാധാകൃഷ്ണന് എംഎല്എ പറഞ്ഞു. തിരുവഞ്ചൂര് രാധാകൃഷ്ണന് എംഎല്എ നേരിട്ടെത്തി നിര്മാണപ്രവര്ത്തനങ്ങള് വിലയിരുത്തി. മന്ത്രിമാരുടെ സമയം അനുസരിച്ച് ഉദ്ഘാടനം നടത്തി പൊതുജനങ്ങള്ക്ക് തുറന്നുകൊടുക്കുമെന്ന് എംഎല്എ പറഞ്ഞു.
