കോട്ടയം : കോട്ടയത്ത് കൊവിഡ് ബാധിച്ച് മരിച്ചയാളുടെ മൃതദേഹം സംസ്കരിച്ചു. മുട്ടമ്പലം ശ്മശാനത്തില് വന് പോലീസ് സന്നാഹത്തോടെയായിരുന്നു സംസ്കാരം നടത്തിയത്. ഇന്ന് രാവിലെ മരിച്ച ഔസേപ്പ് ജോര്ജിന്റെ മൃതദേഹമാണ് സംസ്കരിച്ചത്. നേരത്തെ നാട്ടുകാരുടെ പ്രതിഷേധത്തെതുടര്ന്ന് സംസ്കാരം മാറ്റിവെച്ചിരുന്നു.
കൊവിഡ് പ്രോട്ടോക്കോള് പാലിച്ച് മുട്ടമ്പലത്തെ നഗരസഭാ ശ്മശാനത്തില് മൃതദേഹം അടക്കം ചെയ്യാമെന്നായിരുന്നു തീരുമാനിച്ചിരുന്നത്. എന്നാല് ജനവാസ മേഖലയ്ക്ക് സമീപത്തെ ശ്മശാനത്തില് നാട്ടുകാരെ അറിയിക്കാതെ കൊവിഡ് രോഗിയുടെ മൃതദേഹം സംസ്കരിക്കുന്നത് നാട്ടുകാരെ പ്രകോപിപ്പിച്ചു. നഗരത്തിലെ ശ്മശാനത്തില് കൊവിഡ് ബാധിച്ച് മരിച്ചയാളുടെ മൃതദേഹം സംസ്കരിക്കാന് അനുവദിക്കില്ലെന്നായിരുന്നു നാട്ടുകാരുടെ നിലപാട്. ശ്മശാനത്തിനു സമീപം വീടുകളുണ്ട് എന്നതാണ് നാട്ടുകാരുടെ പ്രധാന ആശങ്ക. മൃതദേഹം സംസ്കരിക്കാന് പളളിയുടെ സ്ഥലമുണ്ടായിട്ടും ഇവിടേക്കു കൊണ്ടുവന്നതില് ദുരൂഹതയുണ്ടെന്നും അവര് പറഞ്ഞു..
