എരുമേലി: ശബരിമല ഗ്രീൻ ഫീൽഡ് വിമാനത്താവളം യാഥാർഥ്യമാക്കാൻ സർവകക്ഷി യോഗത്തിൽ ജനപ്രതിനിധികളുടെയും രാഷ്ട്രീയ പാർട്ടി പ്രതിനിധികളുടെയും സംഘടനകളുടെയും പൂർണ പിന്തുണ. സ്ഥലം നഷ്ടപ്പെടുന്ന കുടുംബങ്ങൾക്ക് മികച്ച പാക്കേജ് നടപ്പാക്കണമെന്ന് സർക്കാരിനോട് യോഗം ആവശ്യപ്പെട്ടു.സ്ഥലം നഷ്ടപ്പെടുന്ന കുടുംബത്തിൽ ഒരാൾക്ക് വിമാനത്താവളത്തിൽ ജോലി സംവരണം ചെയ്യണം. സ്ഥലം നഷ്ടപ്പെടുന്നവരിൽ താൽപര്യമുള്ളവർക്ക് വിമാനത്താവള ഓഹരികൾ വാങ്ങുന്നതിനു മുൻഗണന നൽകണമെന്ന് സർക്കാരിനോട് ആവശ്യപ്പെടാനും സെബാസ്റ്റ്യൻ കുളത്തുങ്കൽ എംഎൽഎയുടെ അധ്യക്ഷതയിൽ ചേർന്ന യോഗം തീരുമാനിച്ചു.
നാട്ടുകാരുടെ ആശങ്കകൾ പരിഹരിക്കുന്നതിനു 24നു 4നു ശബരി ഓഡിറ്റോറിയത്തിൽ ജനകീയ കൺവൻഷൻ നടത്തും. ഗവ. ചീഫ് വിപ് എൻ. ജയരാജ്, ആന്റോ ആന്റണി എംപി, ബ്ലോക്ക് പഞ്ചായത്ത് പ്രസിഡന്റ് അജിതാ രജീഷ്, പഞ്ചായത്ത് പ്രസിഡന്റ് മറിയാമ്മ സണ്ണി, മണിമല പഞ്ചായത്ത് പ്രസിഡന്റ് ജയിംസ് പി.സൈമൺ, ജില്ലാ പഞ്ചായത്ത് അംഗം ജെസി ഷാജൻ, പഞ്ചായത്ത് സ്ഥിര സമിതി അധ്യക്ഷ ലിസി സജി, ബ്ലോക്ക് പഞ്ചായത്ത് സ്ഥിര സമിതി അധ്യക്ഷൻ ടി.എസ്.കൃഷ്ണകുമാർ തുടങ്ങിയവർ പ്രസംഗിച്ചു. വിമാനത്താവളം സ്പെഷൽ ഓഫിസർ വി.തുളസീദാസിന്റെ ഓഫിസിൽ നിന്നുള്ള സാങ്കേതിക വിദഗ്ധർ നടപടികൾ വിശദീകരിച്ചു.
