കോട്ടയം: കൊവിഡ് റെഡ്സോണായ കോട്ടയത്ത് നിയന്ത്രണങ്ങള് കൂടുതല് കര്ക്കശമാക്കി ജില്ലാഭരണകൂടം. അഞ്ച് പേരില് കൂടുതല് ആളുകള് കൂട്ടം കൂടുന്നത് ജില്ലയില് നിരോധിച്ചു. ജില്ലാ അതിര്ത്തികളില് പോലീസ് പരിശോധന കര്ശനമാക്കിയിട്ടുണ്ട്. 395 പേരുടെ സ്രവ പരിശോധനാ ഫലങ്ങളാണ് ഇന്ന് പ്രതീക്ഷിക്കുന്നത്. ഒരാഴ്ച്ചക്കുശേഷം ഇന്നലെ കൊവിഡ് കേസുകള് റിപ്പോര്ട്ട് ചെയ്യാത്തത് കോട്ടയത്തിന് ആശ്വാസമായി. എങ്കിലും ഒരാഴ്ചകൊണ്ട് ജില്ലയില് കൊവിഡ് രോഗികളുടെ എണ്ണം 17 ആയത് ആശങ്കപ്പെടുത്തുന്നതാണ്. ഈ പശ്ചാത്തലത്തിലാണ് ജില്ലയില് നിയന്ത്രണങ്ങള് കൂടുതല് കര്ശനമാക്കിയത്.
പത്തനംതിട്ട, ഇടുക്കി, ആലപ്പുഴ, എറണാകുളം ജില്ലകളുമായി അതിര്ത്തി പങ്കിടുന്ന 14 ഇടങ്ങളിലും പരിശോധന കര്ശനമാക്കി. ഇടവഴികളിലും നിരീക്ഷണമേര്പ്പെടുത്തി. രോഗികളുടെ വീടുകള് സ്ഥിതി ചെയ്യുന്ന കണ്ടെയ്ന്മെന്റ് മേഖലകളില് പോലീസ് ബാരിക്കേഡുകള് സ്ഥാപിച്ച് യാത്രാ വിലക്ക് ഏര്പ്പെടുത്തി. ജില്ലയില് വാഹന ഗതാഗതത്തിനും വിലക്കുണ്ട്. അത്യാവശ്യത്തിനല്ലാതെ പുറത്തിറങ്ങിയാല് വാഹനം പിടിച്ചെടുക്കും. കോട്ടയത്ത് 1040 പേര് വീടുകളില് നിരീക്ഷണത്തില് കഴിയുന്നുണ്ട്. പ്രത്യേക കൊവിഡ് കെയര് സെന്ററുകളില് 18 പേരും നിരീക്ഷണത്തിലാണ്.
ഇതിനിടെ കഴിഞ്ഞ ദിവസം കൊവിഡ് സ്ഥിരീകരിച്ച അഞ്ച് പേരുടെ റൂട്ട്മാപ്പ് ജില്ലാഭരണകൂടം പ്രസിദ്ധീകരിച്ചു. ജില്ലയില് എട്ട് പഞ്ചായത്തുകളും ചങ്ങനാശേരി നഗരസഭയും തീവ്രബാധിത മേഖലയാണ്. സാമൂഹ്യ വ്യാപന സാധ്യയുണ്ടോയെന്നറിയാന് ജില്ലയില് റാപ്പിഡ് ടെസ്റ്റുകള് പുരോഗമിക്കുകയാണ്.
The post കോട്ടയത്ത് നിയന്ത്രണങ്ങള് കൂടുതല് കര്ക്കശമാക്കി ; 395 പേരുടെ പരിശോധനാ ഫലങ്ങള് ഇന്ന് ലഭിക്കും appeared first on Pathanamthitta Media.
