തിരുവല്ല: കോവിഡ് ഫസ്റ്റ് ലൈന് ട്രീറ്റ്മെൻറ് സെൻററിനായി ഏറ്റെടുത്ത കോട്ടയ്ക്കാട് മെഡികെയര് ആശുപത്രിയില്നിന്ന് ഉടമയുടെ അനുമതി ഇല്ലാതെ ആശുപത്രി ഉപകരണങ്ങള് കടത്തിയെന്ന പരാതിയില് ഇരവിപേരൂര് പഞ്ചായത്ത് വൈസ് പ്രസിഡൻറ് ഉള്പ്പെടെയുള്ളവർക്ക് എതിരെ പോലീസ് കേസെടുത്തു.
ആശുപത്രിയില് സൂക്ഷിച്ച ഉപകരണങ്ങളും കിടക്കകളും ദിവാന്കോട്ടും മേശകളും ആശുപത്രി അനുബന്ധ ഉപകരണങ്ങളുമാണ് ആശുപത്രി വാര്ഡിൻെറയും സ്റ്റോര് റൂമിൻെറയും വാതില് പൊളിച്ച് വൈസ് പ്രസിഡൻറ് എന്. രാജീവിൻെറ നേതൃത്വത്തിലുള്ള സംഘം കഴിഞ്ഞമാസം 19ന് കടത്തിക്കൊണ്ടുപോയത്. ഇതു സംബന്ധിച്ച് തിരുവല്ല സി.ഐക്ക് ആശുപത്രി ഉടമ തോമസ് മാത്യു കോട്ടയ്ക്കാട്ട് പരാതി നൽകിയിരുന്നു.
സി.പി.എം നേതാവിൻെറ സഹോദരപുത്രനായ പഞ്ചായത്ത് വൈസ് പ്രസിഡൻറിനും കൂട്ടര്ക്കും എതിരെയുള്ള കേസ് അന്വേഷിക്കാന് പോലീസ് മടിച്ചതിനെ തുടര്ന്ന് അഡ്വ. രാജേഷ് ചാത്തങ്കേരി മുഖാന്തരം തിരുവല്ല ഫസ്റ്റ് ക്ലാസ് മജിസ്ട്രേറ്റ് കോടതിയില് സ്വകാര്യ അന്യായം ഫയല് ചെയ്തു. കോടതി നിര്ദേശത്തെ തുടര്ന്നാണ് തിരുവല്ല പോലീസ് കേസ് രജിസ്റ്റര് ചെയ്തത്. കോവിഡ് സെൻററിൻെറ ചുമതലയുള്ള ഡോ. ശ്രീകാന്ത്, പഞ്ചായത്ത് സെക്രട്ടറി ഉള്പ്പെടെ കണ്ടാലറിയാവുന്ന ആളുകള്ക്ക് എതിരെയാണ് കേസ് രജിസ്റ്റര് ചെയ്തതെന്ന് പോലീസ് പറഞ്ഞു.