കശ്മീർ : കൊറോണ ഭീതിയില്‍ കശ്മീരിലെ വിനോദ സഞ്ചാര കേന്ദ്രങ്ങളെല്ലാം അടച്ചുപൂട്ടിയ അവസ്ഥയാണ്. കൊറോണ വൈറസ് പൊട്ടിപ്പുറപ്പെട്ടതിനെ തുടര്‍ന്ന് കശ്മീരില്‍ വിദേശ വിനോദ സഞ്ചാരികളുടെ പ്രവേശനം നിരോധിച്ചിരിക്കുകയാണ്. വൈറസ് പടരാതിരിക്കാന്‍ എല്ലാ റെസ്റ്റോറന്റുകളും ഹോട്ടലുകളും കമ്മ്യൂണിറ്റി ഹാളുകളും അടച്ചിടുമെന്ന് സംസ്ഥാന സര്‍ക്കാര്‍ ഉത്തരവ് പുറപ്പെടുവിച്ചു.
മിസോറാം, അരുണാചല്‍ പ്രദേശ്, നാഗാലാന്റ്, സിക്കിം എന്നിവിടങ്ങളിലെ പ്രധാന വിനോദ സഞ്ചാര കേന്ദ്രങ്ങളെല്ലാം നേരത്തെ തന്നെ അടച്ചിരുന്നു. കശ്മീരില്‍ അധികാരികള്‍ എല്ലാ പൂന്തോട്ടങ്ങളും പാര്‍ക്കുകളും അടച്ചുപൂട്ടുന്നതായി പ്രഖ്യാപിക്കുകയും, കൂടുതല്‍ അറിയിപ്പ് ഉണ്ടാകുന്നതുവരെ ഒന്നും തുറന്നു പ്രവര്‍ത്തിക്കില്ലെന്നും അറിയിച്ചു കഴിഞ്ഞു. ഇത്തരമൊരു നടപടി നടപ്പാക്കുന്നതില്‍ ജനങ്ങളുടെ സഹകരണം വിലമതിക്കുമെന്ന് അധികൃതര്‍ അഭിപ്രായപ്പെട്ടു. ഏതെങ്കിലും അറിയിപ്പ് പുറപ്പെടുവിക്കുന്നതുവരെ പാര്‍ക്കുകള്‍ പൊതുജനങ്ങള്‍ക്കായി തുറക്കില്ലെന്ന് ഉറപ്പാക്കേണ്ടത് ബന്ധപ്പെട്ട എസ്റ്റേറ്റ്‌സ് ഓഫീസറുടെ ഉത്തരവാദിത്തമാണെന്ന് ഉത്തരവില്‍ പറയുന്നു.
ഏറ്റവും പുതിയ റിപ്പോര്‍ട്ടുകള്‍ പ്രകാരം ജമ്മു കശ്മീരിലെ വിദ്യാഭ്യാസ സ്ഥാപനങ്ങളും സ്‌കൂളുകളും അടച്ചുപൂട്ടാനുള്ള അധികാരം അധികൃതര്‍ ഇതിനകം പാസാക്കിയിട്ടുണ്ട്. ആവശ്യമായ മുന്‍കരുതല്‍ നടപടിയായി പൊതു ജിംനേഷ്യങ്ങളും ക്ലബ്ബുകളും അടച്ചു. മാത്രമല്ല, സമ്മേളനങ്ങള്‍, റാലികള്‍, വര്‍ക്ക് ഷോപ്പുകള്‍, ഒത്തുചേരലുകള്‍, കുത്തിയിരിപ്പ് സമരങ്ങള്‍ എന്നിവയും ഉത്തരവ് പ്രകാരം മാര്‍ച്ച് 31 വരെ അനുവദിക്കില്ല. കൂടാതെ ഒരു കമ്മ്യൂണിറ്റി ഹാളും ഇനിമുതല്‍ ഏതെങ്കിലും പൊതുപ്രവര്‍ത്തനത്തിനായി സാമൂഹികമോ മതപരമോ ആയ ഒരു ബുക്കിംഗും നല്‍കില്ല. സര്‍ക്കാര്‍ ആവശ്യങ്ങള്‍ക്കും സ്വകാര്യ ആവശ്യങ്ങള്‍ക്കും കമ്മ്യൂണിറ്റി ഹാളുകള്‍ ബുക്കിംഗ് സ്വീകരിക്കില്ല. ഇതുകൂടാതെ രോഗ ലക്ഷണങ്ങള്‍ കാണുന്ന ആള്‍ക്കാറെ ഐസൊലേഷനിലേക്ക് മാറ്റുകയോ ക്വാറന്റീന്‍ സൗകര്യം നല്‍കുകയോ ചെയ്യും. സബ് ഡിവിഷണണല്‍ മജിസ്‌ട്രേറ്റുമാര്‍ക്കാണ് നടപടികളെടുക്കാനുള്ള അധികാരം നല്‍കിയിരിക്കുന്നത്.
