കൊയിലാണ്ടി : ദേശീയപാതയിൽ തിരുവങ്ങൂരിന് സമീപം വെറ്റിലപ്പാറയിൽ ഹോട്ടൽ ജീവനക്കാരനെ ഇടിച്ചിട്ട് നിർത്താതെ പോയ ലോറി നാട്ടുകാർ തിരുവങ്ങൂരിൽ വെച്ച് പിടികൂടി. ഗുരുതരമായി പരിക്കേറ്റ സിഎം ഹോട്ടൽ ക്യാഷ്യറായ കൊളക്കാട് സ്വദേശി മണ്ണാർകണ്ടി മൺസൂർ (45) കോഴിക്കോട് മെഡിൽ കോളെജിൽ പ്രവേശിപ്പിച്ചു. ഇയാള്ക്ക് വാരിയെല്ലിനും തലയ്ക്കുമാണ് പരിക്ക്. മെഡിക്കൽ കോളെജിൽ അടിയന്തര ശസ്ത്രക്രിയക്ക് വിധേയമാക്കി.
വ്യാഴാഴ്ച രാത്രി 10 മണിയോടെയാണ് സംഭവം. മൺസൂറിനെ ഇടിച്ച ശേഷം നിർത്താതെ ലോറി തിരുവങ്ങൂരിൽ മറ്റൊരു വാഹനത്തിനെ ഇടിക്കാൻ ശ്രമിച്ചതോടെ ഡ്രൈവർ ഇറങ്ങി ഓടുകയായിരുന്നു. തുടർന്ന് നാട്ടുകാർ അത്തോളി റോഡിൽ വെച്ച് കണ്ണൂർ അഴീക്കോട് പനയൻ വി.മോഹനനെ പിടികൂടി കൊയിലാണ്ടി പോലീസിനെ ഏല്പിച്ചു. ഡ്രൈവർ മദ്യപിച്ചിരുന്നതായി നാട്ടുകാർ ആരോപിച്ചു.
