പത്തനംതിട്ട : അഴിമതിയുടേയും ആശ്രിത നിയമനങ്ങളുടേയും കഥകള് തെളിവുകളോടെ പുറത്തുവരുമ്പോള് അന്വേഷണ പ്രഹസനം നടത്തി സംസ്ഥാന സര്ക്കാര് ജനങ്ങളെ കബളിപ്പിക്കുകയാണെന്ന് കെ.പി.സി.സി ജനറല് സെക്രട്ടറി അഡ്വ. എ.എ ഷുക്കൂര് പറഞ്ഞു. ഡി.സി.സി നേതൃത്വ യോഗം രാജീവ് ഭവനില് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
എംപ്ലോയിമെന്റ് എക്സ്ചേഞ്ചുകളില് പേര് രജിസ്റ്റര് ചെയ്ത് ലക്ഷക്കണക്കിന് യുവാക്കള് തൊഴിലിനുവേണ്ടി കാത്തിരിക്കുമ്പോള് അവരെ കബളിപ്പിച്ച് പാര്ട്ടി നേതാക്കളുടെ ബന്ധുക്കളേയും ആശ്രിതരെയും സര്ക്കാര് ജോലികളില് പിന്വാതിലിലൂടെ നിയമിക്കുന്ന സര്ക്കാര് നടപടി അംഗീകരിക്കാനാവില്ലെന്ന് എ.എ ഷുക്കൂര് പറഞ്ഞു.
തിരുവന്തപുരം കോര്പ്പറേഷനില് മേയറുടെ കത്ത് വിവാദത്തില് സര്ക്കാര്ക്കാരിന്റെ അന്വേഷണം വെള്ളത്തില് വരച്ച വരപോലെയാണെന്നും പാര്ട്ടി നേതാക്കള് ഉള്പ്പെട്ട എല്ലാ കേസുകളിലെയും അന്വേഷണം ഭരണത്തിന്റെ തണലില് അട്ടമറിക്കുകയാണെന്നും അദ്ദേഹം പറഞ്ഞു. സര്ക്കാരിന്റെ ജനദ്രേഹ നടപടികള്ക്കെതിരെ കോണ്ഗ്രസ് ശക്തമായ സമരപരിപാടികള് തുടരുമെന്ന് കെ.പി.സി.സി ജനറല് സെക്രട്ടറി പറഞ്ഞു.
ഡി.സി.സി പ്രസിഡന്റ് പ്രൊഫ. സതീഷ് കൊച്ചുപറമ്പില് അദ്ധ്യക്ഷത വഹിച്ചു. കെ.പി.സി.സി രാഷ്ട്രീയകാര്യ സമിതി അംഗം പ്രൊഫ. പിജെ കുര്യന്, ആന്റോ ആന്റണി എം.പി, കെ.പി.സി.സി ജനറല് സെക്രട്ടറി പഴകുളം മധു, മുന് ഡി.സി.സി പ്രസിഡന്റുമാരായ കെ.ശിവദാസന് നായര്, പി. മോഹന്രാജ്, ബാബു ജോര്ജ്ജ്, എ.ഐ.സി.സി അംഗം മാലേത്ത് സരളാദേവി, കെ.പി.സി.സി നിര്വ്വാഹക സമിതി അംഗം ജോര്ജ്ജ് മാമ്മന് കൊണ്ടൂര്, അനീഷ് വരിക്കണ്ണാമല, റിങ്കു ചെറിയാന്, അനില് തോമസ്, വെട്ടൂര് ജ്യോതിപ്രസാദ്, സാമുവല് കിഴക്കുപുറം, കാട്ടൂര് അബ്ദുള്സലാം, കെ. ജയവര്മ്മ, മാത്യു കുളത്തിങ്കല്സുനില്. എസ്. ലാല്, സജി കൊട്ടയ്ക്കാട്, ജോണ്സണ് വിളവിനാല്, എന്നിവര് പ്രസംഗിച്ചു.
