പട്ടാമ്പി : കെ.എസ്.ആര്.ടി.സി ബസ്സ് ഇടിച്ച് ബൈക്ക് യാത്രക്കാരന് ഗുരുതര പരിക്ക്. പട്ടാമ്പി വിളയൂരിലിണ് സംഭവം. അപകടത്തിന്റെ സി.സി.ടി.വി ദൃശ്യങ്ങള് പുറത്ത് വന്നിട്ടുണ്ട്. വിളയൂര് സെന്ററില് ഇന്നലെ വൈകുന്നേരം 7.30 നാണ് അപകടം ഉണ്ടായത്. മലപ്പുറം കൊളത്തൂര് സ്വദേശി സതീഷ് കുമാറിനാണ് അപകടത്തില് പരിക്കേറ്റത്. ഇയാളെ പെരിന്തല്മണ്ണയിലെ സ്വകാര്യ ആശുപത്രിയില് പ്രവേശിപ്പിച്ചിരിക്കുകയാണ്. ഇയാളുടെ ആരോഗ്യനില അതീവ ഗുരുതരമാണെന്ന് ആശുപത്രി അധികൃതര് അറിയിച്ചു.
ഇടതുവശം ചേര്ന്ന് പോയിക്കൊണ്ടിരുന്ന ഇരുചക്രവാഹനത്തിനെ കെഎസ്ആര്ടിസി ബസ് ഇടിക്കുന്നത് ദൃശ്യങ്ങളില് വ്യക്തമാണ്. കെ.എസ്.ആര്.ടി.സി ബസ് അശ്രദ്ധമായി ഓവര്ടേക്ക് ചെയ്യുമ്പോഴാണ് അപകടമുണ്ടായത് എന്ന് ദൃക്സാക്ഷികളായ നാട്ടുകാര് ആരോപിച്ചു. തിരുവനന്തപുരം താമരശ്ശേരി റൂട്ടില് സഞ്ചരിക്കുന്ന കെഎസ്ആര്ടിസി ഇടിച്ചാണ് അപകടമുണ്ടായത്. ബസ് കൊപ്പം പോലീസ് കസ്റ്റഡിയിലെടുത്തു.
