തിരുവനന്തപുരം : കാട്ടാക്കടയില് മകള്ക്ക് മുന്നില് വെച്ച് അച്ഛനെ മര്ദിച്ച കെ.എസ്.ആര്.ടി.സി ജീവനക്കാരുടെ അറസ്റ്റ് ഇന്ന് ഉണ്ടായേക്കുമെന്നാണ് സൂചന. ആക്രമണം നടത്തിയവരില് കണ്ടാല് അറിയാവുന്ന അഞ്ച് പേര്ക്കെതിരെയാണ് കാട്ടാക്കട പോലീസ് കേസെടുത്തിരിക്കുന്നത്. കയ്യേറ്റം ചെയ്യല്, സംഘം ചേര്ന്ന് ആക്രമിക്കല്, ദേഹോപദ്രവം ഏല്പ്പിക്കല് തുടങ്ങിയ ജാമ്യം ലഭിക്കാവുന്ന കുറ്റങ്ങളാണ് ചുമത്തിയിരിക്കുന്നത്. ആമച്ചാല് സ്വദേശി പ്രേമനാണ് മര്ദ്ദനമേറ്റത്. മകള് രേഷ്മയെ ആക്രമണത്തിനിടെ തള്ളി മാറ്റിയതിന് കേസെടുത്തിട്ടില്ല.
യൂണിയന് നേതാക്കള് ഉള്പ്പെട്ട കേസായതിനാല് അറസ്റ്റ് വൈകിപ്പിക്കാന് രാഷ്ട്രീയ ഇടപെടല് ഉണ്ടാകുമെന്ന വിമര്ശനം ശക്തമാണ്. രേഷ്മയുടെ മൊഴി രേഖപ്പെടുത്തി കൂടുതല് ശക്തമായ വകുപ്പുകള് ചുമത്തണമെന്നാണ് ഇരുവരുടേയും ആവശ്യം. നിലവില് കാട്ടാക്കട ആശുപത്രിയില് ചികില്സയിലാണ് പ്രേമന്.
