പത്തനംതിട്ട : മണ്ഡല കാലം തുടങ്ങിയിട്ടും ജില്ലാ ആസ്ഥാനത്തെ ഡിപ്പോയിൽ തീർഥാടകർക്കുള്ള സൗകര്യം ഒരുക്കാതെ കെ.എസ്.ആർ.ടി.സി. മുകളിലത്തെ നിലയിൽ വിരിവെയ്ക്കാനുള്ള സൗകര്യം ഒരുക്കുന്നതില് നടപടിയായിട്ടില്ല. പൊടിയും അഴുക്കും പിടിച്ച് വൃത്തിഹീനമായി കിടക്കുകയാണിവിടം.
കഴിഞ്ഞ മണ്ഡലകാലത്ത് പായ, തലയണ, ഫാൻ, കുടിവെള്ളം തുടങ്ങിയ സൗകര്യങ്ങളെല്ലാം മുകളിലത്തെ നിലയിൽ ഒരുക്കിയിരുന്നു. തീർഥാടനം തുടങ്ങിയതോടെ ഇപ്പോഴുള്ളതിനേക്കാൾ വലിയ തിരക്കാണ് സ്റ്റാൻഡിൽ അനുഭവപ്പെടുന്നത്. എത്തുന്ന പകുതിപ്പേർക്കെങ്കിലും ഇരിക്കാനുള്ള സൗകര്യംപോലും ഇപ്പോഴും ഒരുക്കിയിട്ടില്ല. പ്രായമായവരും കുട്ടികളും ഉൾപ്പടെ നിരവധിപ്പേരാണ് ബസുകാത്ത് ഇവിടെ ദിനംപ്രതി എത്തുന്നത്. ഇരിപ്പിടങ്ങൾ നിറഞ്ഞാൽ ബാക്കിയുള്ളവർ നിൽക്കേണ്ട അവസ്ഥയാണുള്ളത്.
നിരവധിപേർ എത്തുന്ന ഡിപ്പോയിൽ പുതിയ പോലീസ് എയ്ഡ് പോസ്റ്റ് സ്ഥാപിച്ചിട്ട് നാളുകളായി. എന്നാൽ ഇതുവരെ ഇങ്ങോട്ടേക്ക് പോലീസ് എത്തിയിട്ടില്ല. തീർഥാടനം തുടങ്ങുന്നതിന് മുമ്പേതന്നെ ഇവിടെ പോലീസിനെ നിയോഗിക്കുമെന്ന് ഡി.ജി.പി.യുടെ സാന്നിധ്യത്തിൽ ജില്ലാ പോലീസ് മേധാവി പറഞ്ഞിരുന്നതാണ്. എന്നാല് ഇതുവരെ നടപടിയായിട്ടില്ല.
