തിരുവനന്തപുരം : കെ.എസ്.ആര്.ടി.സി ബസുകള് മാലിന്യനീക്കത്തിന് ഉപയോഗിക്കാനുള്ള നീക്കത്തിനെതിരെ യൂണിയനുകള് പരാതി അറിയിച്ചിട്ടില്ലെന്ന് ഗതാഗതമന്ത്രി ആന്റണിരാജു. തദ്ദേശവകുപ്പ് നിലപാട് അറിയിച്ചാല് പദ്ധതി ഉടന് നടപ്പാക്കും. കട്ടപ്പുറത്തായ കെ.എസ്.ആര്.ടി.സി ബസുകള് മത്സ്യവില്പ്പനയ്ക്ക് ഉപയോഗിക്കുന്നതും പരിഗണനയില്.
കെ.എസ്.ആര്.ടി.സി ബസുകള് മാലിന്യനീക്കത്തിന് ഉപയോഗിക്കാനുള്ള നീക്കത്തിനെതിരായ യൂണിയനുകളുടെ പ്രതിഷേധം അറിയില്ലെന്ന നിലപാടിലാണ് ഗതാഗതമന്ത്രി ആന്റണി രാജു. തെറ്റിദ്ധാരണയുണ്ടെങ്കില് നീക്കുമെന്ന് പറഞ്ഞ മന്ത്രി സര്ക്കാരിന്റെ തീരുമാനങ്ങള് അംഗീകരിക്കാന് ജീവനക്കാരും യൂണിയനുകള് ബാധ്യസ്ഥരാണെന്ന് കൂട്ടിച്ചേര്ത്തു.
ഡ്രൈവര്മാര് മാലിന്യം നീക്കേണ്ടതില്ലെന്നും വാഹനം ഓടിച്ചാല് മാത്രം മതിയാകുമെന്നും മന്ത്രി പറഞ്ഞു. മത്സ്യംവില്ക്കുന്ന സ്ത്രീകള് അടുത്തകാലത്ത് നേരിട്ട ചില ദുരനുഭവങ്ങള് കണക്കിലെടുത്താണ് ഫിഷറീസ് വകുപ്പുമായി സഹകരിച്ച് മത്സ്യവില്പ്പനയ്ക്ക് കെ.എസ്.ആര്.ടി.സി ബസുകള് പരിഗണിക്കുന്നത്. ഡിപ്പോകളിലായിരിക്കും മത്സ്യവില്പ്പനയ്ക്ക് സൗകര്യമൊരുക്കുക.
