പത്തനംതിട്ട : കെഎസ്ആർടിസി പത്തനംതിട്ട ഡിപ്പോയിൽ ഓണത്തോടനുബന്ധിച്ച് റെക്കോഡ് കളക്ഷൻ. ഞായറാഴ്ച ദിവസം മാത്രം 11,94,872 രൂപയാണ് കലക്ഷൻ. 46 സർവീസാണ് നടത്തിയത്. ഞായറാഴ്ചയായതിനാൽ ഏതാനും ഓർഡിനറി സർവീസ് ഇല്ലായിരുന്നു. ഓണാവധി നാളുകളിൽ മിക്ക ദിവസങ്ങളിലും നല്ല വരുമാനമാണ് പത്തനംതിട്ട ഡിപ്പോ നേടിയത്. 9, 10 തീയതികളിൽ 10നും 11 ലക്ഷത്തിനുമിടയ്ക്കായിരുന്നു കളക്ഷൻ. കഴിഞ്ഞവർഷം ശബരിമല തിരക്കുണ്ടായിട്ടും പതിനൊന്നരയ്ക്കടുത്തായിരുന്നു വരുമാനം. ഇത്തവണ അതും മറികടന്നു. സാധാരണ 52 സർവീസാണ് നടത്തേണ്ടത്. 52 സർവീസ് നടത്തി ഒമ്പതേമുക്കാൽ ലക്ഷമാണ് ദിവസേനയുള്ള ടാർഗറ്റ്.
വിനോദയാത്രാ പാക്കേജുകൾക്കും നല്ല തിരക്ക്. വാഗമൺ, മലക്കപ്പാറ, ആതിരപ്പള്ളി, കുമരകം എന്നിവിടങ്ങളിലേക്ക് പത്തനംതിട്ടയിൽ നിന്നുള്ള പാക്കേജ് ടൂർ സർവീസിനാണ് തിരക്ക് കൂടുതൽ. കുമരകം ടൂർ ഹൗസ്ബോട്ട് യാത്രയുൾപ്പെടെയാണ്. 1050 രൂപയാണ് നിരക്ക്. ആവശ്യത്തിന് യാത്രക്കാർ ബുക്ക് ചെയ്യുന്ന മുറയ്ക്ക് സർവീസ് നടത്തുകയാണ് ചെയ്യുന്നത്. ഗ്രൂപ്പുകൾക്ക് മുൻകൂട്ടി ബുക്കിങ് നടത്തി യാത്ര നടത്താം. കുമരകം യാത്രയ്ക്ക് മൂന്നുനേരം ഭക്ഷണം ഉൾപ്പെടെയാണ് നിരക്ക്.