കൊച്ചി: കെഎസ്ആര്ടിസി ജീവനക്കാര്ക്ക് പരാതി നല്കുന്നതോടൊപ്പം അച്ചടക്കത്തോടെ ജോലി ചെയ്യാനും ബാധ്യതയുണ്ടെന്ന് സംസ്ഥാന മനുഷ്യാവകാശ കമ്മീഷന്. ജീവനക്കാര് അനധികൃതമായി ജോലിയ്ക്ക് ഹാജരാകാതിരിക്കുന്നത് മൂലം വരുമാനത്തില് കുറവുണ്ടാകുന്നതായി കെഎസ്ആര്ടിസി എംഡി കമ്മീഷനെ അറിയിച്ചിരുന്നു. ഇതിന്റെ പശ്ചാത്തലത്തിലാണ് മനുഷ്യാവകാശ കമ്മീഷന്റെ ഉത്തരവ്.
2018 സെപ്റ്റംബറിലെ ചില ദിവസങ്ങളില് ശമ്പളം ലഭിച്ചിട്ടില്ലെന്നാരോപിച്ച് കെ.എസ്.ആര്.ടി.സി. തൃശൂര് ഡിപ്പോയിലെ ആറ് ഡ്രൈവര്മാര് സമര്പ്പിച്ച പരാതി പരിഗണിക്കുകയായിരുന്നു കമ്മീഷന്. കെഎസ്ആര്ടിസി ജീവനക്കാര്ക്ക് ശമ്പള കുടിശ്ശിക ലഭിക്കാനുണ്ടെങ്കില് അടിയന്തരമായി ലഭ്യമാക്കാന് എം.ഡി. നടപടി സ്വീകരിക്കണമെന്നും കമ്മീഷന് അംഗം വി. കെ. ബീനാകുമാരി ആവശ്യപ്പെട്ടു. എന്നാല് പരാതിക്കാര് മുന്കൂര് അനുമതിയില്ലാതെ അനധികൃതമായി ജോലിക്ക് ഹാജരാകാത്തതു കാരണമാണ് ശമ്പളം നല്കാന് കഴിയാതിരുന്നതെന്ന് എം.ഡിയുടെ റിപ്പോര്ട്ടില് പറയുന്നു.