റാന്നി : നവംബറില് സ്കൂളുകള് തുറക്കുമ്പോള് വിദ്യാര്ത്ഥികള്ക്കുണ്ടാകുന്ന യാത്രാക്ലേശം ഒഴിവാക്കാന് ഇടമണ്-ഇടമുറി-അത്തിക്കയം റൂട്ടില് കെ.എസ്.ആര്.ടി.സി സര്വ്വീസ് ആരംഭിക്കണമെന്ന് എ.ഐ.വൈ.എഫ് നാറാണംമൂഴി മേഖലാ കണ്വന്ഷന് ആവശ്യപ്പെട്ടു. ഉന്നത നിലവാരത്തില് നിര്മ്മിച്ച റോഡുണ്ടായിട്ടും ബസ് സര്വ്വീസ് ഒന്നുപോലുമില്ലാത്ത സ്ഥലമാണ് ഇടമുറി-അത്തിക്കയം ഭാഗം. ഇതില് ഇടമുറി-ഇടമണ് മേഖലയില് സ്വകാര്യ ബസുകള് സര്വ്വീസ് നടത്തുന്നുണ്ടെങ്കിലും കോവിഡു മൂലം എല്ലാ സര്വ്വീസും ആരംഭിച്ചിട്ടില്ല.
സ്കൂള് തുറക്കുന്നതോടെ രണ്ടു ബസിനെ മാത്രം രാവിലെ ആശ്രയിക്കേണ്ടി വരും. ഇത് ബസില് തിരക്കുണ്ടാക്കാനെ കഴിയു. ഇടമുറി സ്കൂളില് ഹയര്സെക്കന്ഡറി വിഭാഗത്തില് പഠിക്കുന്ന കുട്ടികള്ക്കും എത്തിച്ചേരാന് പ്രയാസമാണ്. ഈ സാഹചര്യത്തില് ഇടമുറി-അത്തിക്കയം റൂട്ടില് കെ.എസ്.ആര്.ടി.സി ബസ് സര്വ്വീസ് ആരംഭിക്കാന് അധികൃതര് തയ്യാറാകണമെന്ന് കണ്വന്ഷന് ആവശ്യപ്പെട്ടു. മണ്ഡലം പ്രസിഡന്റ് എം.ശ്രീജിത്ത് മേഖലാ കണ്വന്ഷന് ഉദ്ഘാടനം ചെയ്തു. പി.എസ് ബിനുമോന് അധ്യക്ഷത വഹിച്ചു. സി.പി.ഐ ലോക്കല് സെക്രട്ടറി എം.വി പ്രസന്നകുമാര്, അസി.സെക്രട്ടറി വി.ടി വര്ഗീസ്, പി.സി എബ്രഹാം, എം.ജി സതീഷ്, കെ.എസ് ഷാജി, വി.അജിത്ത് എന്നിവര് പ്രസംഗിച്ചു. ഭാരവാഹികളായി സ്റ്റീഫന് ജോസഫ് (പ്രസിഡന്റ്), അനീഷ് ജോസഫ് (വൈസ് പ്രസിഡന്റ്), എന്.പി ജിനുമോന് (സെക്രട്ടറി), ജേക്കബ് തോമസ് (ജോയിന്റ് സെക്രട്ടറി) എന്നിവരെ തിരഞ്ഞെടുത്തു.
