കാലടി: വിദ്യയുടെ വ്യാജരേഖ വിവാദത്തില് കാലടി സര്വകലാശാലയിലേക്ക് കെഎസ്യു നടത്തിയ മാര്ച്ചില് സംഘര്ഷം. പോലീസ് ബാരക്കേഡുകള് തള്ളിമാറ്റി പ്രവര്ത്തകര് ക്യാംപസിന് അകത്തേക്ക് കടക്കാന് ശ്രമിച്ചു. ഇത് പോലീസ് തടഞ്ഞതോടെ പ്രവര്ത്തകരും പോലീസും തമ്മില് വാക്കേറ്റമുണ്ടാവുകയും തുടര്ന്ന് പ്രവര്ത്തകര് സര്വ്വകലാശാലയ്ക്ക് മുന്നിലുള്ള റോഡിലെ വാഹനങ്ങള് തടഞ്ഞു. നിലവില് പ്രവര്ത്തകര് റോഡില് കുത്തിയിരുന്ന് മുദ്രാവാക്യം വിളിച്ച് പ്രതിഷേധിക്കുകയാണ്.
വ്യാജരേഖ ചമച്ച കേസിലെ പ്രതിയായ വിദ്യ സര്വകലാശാലാ ഹോസ്റ്റലിലുണ്ട് എന്നും വിദ്യയെ അറസ്റ്റ് ചെയ്യണം എന്നുമാവശ്യപ്പെട്ട് പ്രവര്ത്തകര് റോഡ് ഉപരോധിച്ചു. സര്വകലാശാലയ്ക്കു മുന്നില് സ്ഥാപിച്ച എസ്എഫ്ഐയുടെ പതാകകളും യൂണിയന് കലോത്സവവുമായി ബന്ധപ്പെട്ടുള്ള ബന്ധപ്പെട്ടുള്ള ഫ്ലക്സ് ബോര്ഡുകളും തകര്ത്തു. ഫ്ലക്സ് ബോര്ഡുകള് സര്വകലാശാലയ്ക്കുള്ളിലേക്ക് വലിച്ചെറിയുകയും ചെയ്തു.
