ചെങ്ങന്നൂര് : താരശോഭ പെയ്തിറങ്ങിയ സായാഹ്നത്തില് ഇന്ത്യന് ഗ്രാമീണ സംസ്ക്കാരത്തിന്റെ വൈവിധ്യവും തനിമയും ഒരുകുടക്കീഴില് അണിനിരത്തി പതിനൊന്നാമത് കുടുംബശ്രീ ദേശീയ സരസ് മേളയ്ക്ക് ചെങ്ങന്നൂര് നഗരസഭാ സ്റ്റേഡിയത്തില് നിറപ്പകിട്ടാര്ന്ന കൊടിയേറ്റം. തദ്ദേശ സ്വയംഭരണ എക്സൈസ് പാര്ലമെന്ററി കാര്യ വകുപ്പ് മന്ത്രി എം.ബി രാജേഷ് സരസ്മേളയുടെ ഉദ്ഘാടനം നിര്വഹിച്ചു.
കേരളീയ നവോത്ഥാന മൂല്യത്തെ യാഥാര്ത്ഥ്യമാക്കിയതും ശാക്തീകരണം എന്ന ആശയത്തെ അര്ത്ഥവത്താക്കിയതും കുടുംബശ്രീയാണെന്ന് തദ്ദേശ സ്വയംഭരണ എക്സൈസ് പാരലമെന്ററി കാര്യ വകുപ്പ് മന്ത്രി എം.ബി രാജേഷ് ഉദ്ഘാടന പ്രസംഗത്തില് പറഞ്ഞു.സരസ് മേള വിജയിപ്പിക്കുന്നതിന് അതുല്യമായ സംഘാടന മികവും ആസൂത്രണവും നടത്തിയ മന്ത്രി സജി ചെറിയാനെ മന്ത്രി എം.ബി രാജേഷ് അഭിനന്ദിച്ചു. കുടുംബശ്രീയുടെ വിപണന സ്റ്റാളുകളുടെ ഉദ്ഘാടനവും മന്ത്രി നിര്വഹിച്ചു.
വികസന കാര്യത്തില് ജനങ്ങളോട് പറഞ്ഞതിലും അപ്പുറം ചെയ്യാന് കഴിഞ്ഞിട്ടുണ്ടെന്ന് സാംസ്കാരിക ഫിഷറീസ് യുവജനകാര്യ വകുപ്പ് മന്ത്രി സജി ചെറിയാന് പറഞ്ഞു. നൂറു കോടിയുടെ ആശുപത്രി, അറുനൂറ്റി ഇരുപത്തഞ്ച് കോടിയുടെ കുടിവെള്ള പദ്ധതിയും നടപ്പാക്കി വരികയാണ്. 2018-ലെ പ്രളയത്തില് നടത്താന് കഴിയാതെ പോയ സരസ് മേള വീണ്ടും പൂര്വാധികം ഭംഗിയോടെ സംഘടിപ്പിക്കാന് കഴിയുന്നതില് ഏറെ അഭിമാനമുണ്ട്. കലാ സാംസ്കാരിക രംഗത്തെ സമഗ്ര സംഭാവനയ്ക്കുള്ള ചെങ്ങന്നൂര് പെരുമ പുരസ്കാരം മന്ത്രി മോഹന്ലാലിന് സമ്മാനിച്ചു. കൃഷി വകുപ്പ് മന്ത്രി പി.പ്രസാദ് മുഖ്യ സന്ദേശം നല്കി. കേരളത്തിന്റെ സാമൂഹിക സാമ്പത്തിക വ്യവസ്ഥയെ അടിമുടി മാറ്റിയെഴുതിയ കുടംബശ്രീയുടെ ഏതു പ്രവര്ത്തനവും അഭിനന്ദനാര്ഹമാണെന്ന് മുഖ്യാതിഥിയായെത്തിയ മോഹന്ലാല് പറഞ്ഞു. മഹാനഗരങ്ങള് കേന്ദ്രീകരിച്ചു മാത്രം നടത്തിയിരുന്ന ഇത്തരം മേള ചെങ്ങന്നൂര് പോലെയുള്ള ഗ്രാമീണ മേഖലയില് നടത്താന് അക്ഷീണം പരിശ്രമിക്കുന്ന സുഹൃത്തായ മന്ത്രി സജി ചെറിയാനെ അഭിനന്ദിക്കുന്നതായും മോഹന്ലാല് പറഞ്ഞു.
മേളയിലെത്തിയ എല്ലാ സംരംഭകര്ക്കും മികച്ച രീതിയിലുള്ള നേട്ടം കൈവരിക്കാന് കഴിയട്ടെയെന്നും അദ്ദേഹം ആശംസിച്ചു. കുടുംബശ്രീ എക്സിക്യൂട്ടീവ് ഡയറക്ടര് എച്ച്. ദിനേശന് സ്വാഗതം പറഞ്ഞു. പ്രോഗ്രാം കമ്മിറ്റി ചെയര്മാന് ഒ.എസ് ഉണ്ണിക്കൃഷ്ണന് റിപ്പോര്ട്ട് അവതരിപ്പിച്ചു. നിള എന്ന റോബോട്ടാണ് മന്ത്രിമാരായ എം.ബി രാജേഷ്, സജി ചെറിയാന്, പി.പ്രസാദ് എന്നിവരെ സ്വീകരിക്കാന് വേദിയിലെത്തിയത്. എച്ച്.സലാം, എം.എസ് അരുണ്കുമാര്, ജില്ലാ പഞ്ചായത്ത് പ്രസിഡന്റ് കെ.ജി രാജേശ്വരി, കലക്ടര് അലക്സ് വര്ഗീസ്, ചെങ്ങന്നൂര് നഗരസഭാ അധ്യക്ഷ ശോഭാ വര്ഗീസ്, മുന് എം.എല് എ ശോഭനാ ജോര്ജ്, കെ.എസ്.സി.എം.എം.സി ചെയര്മാന് എം.എച്ച് റഷീദ്, ബ്ളോക്ക് പഞ്ചായത്ത് പ്രസിഡന്റ് കെ.എം സലിം, പഞ്ചായത്ത് പ്രസിഡന്റ്സ് അസോസിയേഷന് പ്രസിഡന്റ് കെ.എം ഉഷ, ചെങ്ങന്നൂര് നഗരസഭാ സി.ഡി.എസ് അധ്യക്ഷ എസ്.ശ്രീകല എന്നിവര് പ്രസംഗിച്ചു. കുടുംബശ്രീ എക്സിക്യൂട്ടീവ് ഡയറക്ടര് എച്ച്.ദിനേശന് സ്വാഗതവും ജില്ലാ മിഷന് കോര്ഡിനേറ്റര് രഞ്ജിത് എസ് നന്ദിയും പറഞ്ഞു.
