എറണാകുളം : വൈറ്റില, കുണ്ടന്നൂര് മേല്പ്പാലങ്ങളുടെ ഭാരപരിശോധനാ ഫലം തൃപ്തികരമെന്ന് റിപ്പോര്ട്ട്. പാലം തുറന്നു കൊടുക്കുന്നതിന് മുന്നോടിയായാണ് പരിശോധന നടത്തിയത്. രണ്ട് ദിവസത്തിനകം സര്ക്കാരിന് റിപ്പോര്ട്ട് കൈമാറും.
ഇന്നലെ രാത്രിയോടെയാണ് ഭാരപരിശോധനാ നടപടികള് പൂര്ത്തിയായത്. മെറ്റലും മണലും നിറച്ച ലോറികള് പല തവണ പാലത്തില് നിര്ത്തിയിട്ടാണ് പരിശോധനയുടെ ആദ്യഘട്ടം നടത്തിയത്. 24 മണിക്കൂര് ഇതിന്റെ ഭാഗമായി വാഹനങ്ങള് പാലത്തില് നിര്ത്തിയിട്ടു. വൈറ്റില പാലത്തില് 126 ടണ്ണും കുണ്ടന്നൂരില് 160 ടണ്ണുമാണ് ഭാരം കയറ്റിയത്. തുടര്ന്ന് രണ്ട് പാലങ്ങളിലെയും ഭാരം ഇറക്കിയതിന് ശേഷം 24 മണിക്കൂര് നിരീക്ഷണവും നടത്തി. ചീഫ് എന്ജിനീയറുടെ നേതൃത്വത്തില് മൂന്നംഗങ്ങള് ഉള്പ്പെട്ട സംഘമാണ് പരിശോധനകള്ക്ക് മേല്നോട്ടം വഹിച്ചത്. ഭാര പരിശോധനാഫലം തൃപ്തികരമായതിനാല് ഉടന് ഉദ്ഘാടനം ഉണ്ടാകാമെന്നാണ് സൂചന.
