ഡൽഹി : സംസ്ഥാന സർക്കാരിന്റെ ഡൽഹിയിലെ പ്രത്യേക പ്രതിനിധി സ്ഥാനത്തുനിന്നും കെ വി തോമസ് ഒഴിഞ്ഞു. ഔദ്യോഗിക പദവി ഒഴിഞ്ഞതിനെത്തുടർന്ന് ഡൽഹിയിൽ അദ്ദേഹം സ്ഥിരമായി താമസിച്ചിരുന്ന കേരള ഹൗസിലെ 304-ാം നമ്പർ മുറിയും അതിഥികൾക്കായി വിട്ടുനൽകി. 2023 ജനുവരി 19-നാണ് കെ വി തോമസിനെ ഡൽഹിയിലെ പ്രത്യേക പ്രതിനിധിയായി ക്യാബിനറ്റ് നിയമിച്ചത്. നിലവിലെ എൽഡിഎഫ് സർക്കാരിന്റെ കാലാവധി കഴിയുന്നതോടെ ഈ സ്ഥാനവും ഇല്ലാതാകുമെന്ന് നിയമന ഉത്തരവിൽ തന്നെ വ്യക്തമാക്കിയിരുന്നു.
കേരളത്തിൽ പുതിയ മന്ത്രിസഭ അധികാരത്തിൽ വന്ന സാഹചര്യത്തിൽ പ്രത്യേകമായി രാജിക്കത്ത് നൽകേണ്ട ആവശ്യമില്ലെന്നും പദവി സ്വയം റദ്ദായതായും കെ വി തോമസ് വ്യക്തമാക്കി. കെ വി തോമസിന്റെ ഈ പദവിയും അദ്ദേഹത്തിന് നൽകിയിരുന്ന ആനുകൂല്യങ്ങളും നേരത്തെ വലിയ രീതിയിലുള്ള രാഷ്ട്രീയ വിമർശനങ്ങൾക്ക് ഇടയാക്കിയിരുന്നു. നിലവിൽ സർക്കാരിന്റെ കാലാവധി പൂർത്തിയായതോടെയാണ് അദ്ദേഹം ഔദ്യോഗികമായി പദവി ഒഴിഞ്ഞിരിക്കുന്നത്.
