പത്തനംതിട്ട : പത്തനംതിട്ട നഗരത്തിലെ സവിത ആശുപത്രിയിലെ ലിഫ്റ്റില് കുടുങ്ങിയ രോഗിയെ സാഹസികമായി അഗ്നിശമനസേന രക്ഷപ്പെടുത്തി. ചിറ്റാര് സ്വദേശിനി മറിയാമ്മയാണ് അരമണിക്കൂര് നേരം ലിഫ്റ്റില് കുടുങ്ങിയത്. ഇന്ന് ഉച്ചയ്ക്ക് ഒരുമണിയോടെയാണ് സംഭവം. മറിയാമ്മയെ പത്തനംതിട്ട ജനറല് ആശുപത്രിയിലേക്ക് മാറ്റി. മൂന്നാമത്തെ നിലയില് നിന്ന് ഡോക്ടറെ കണ്ടശേഷം ആശുപത്രി ജീവനക്കാരിക്കൊപ്പം താഴത്തെ നിലയിലേക്ക് എത്തുകയായിരുന്നു മറിയാമ്മ.
പുറത്തേക്കിറങ്ങുന്നതിനിടെ മധ്യവയസ്കയുടെ കാല് ലിഫ്റ്റിനിടയില് കുടുങ്ങുകയും ലിഫ്റ്റ് താഴേക്ക് പോവുകയും ചെയ്തു. അങ്ങനെ മറിയാമ്മയുടെ കാലുകള് മുകളില് ആവുകയും തലതാഴോട്ടുമായ അവസ്ഥയിലായിരുന്നു. അരമണിക്കൂര് നേരം ഇതുപോലെ ഇവര് ലിഫ്റ്റിനുള്ളില് കുടുങ്ങി. ഉടന് തന്നെ സ്ഥലത്തെത്തിയ അഗ്നിശമനസേന അതിവിദഗ്ധമായാണ് ഇവരെ രക്ഷപെടുത്തിയത്.
അരമണിക്കൂറോളം നീണ്ട രക്ഷാപ്രവര്ത്തനത്തിനൊടുവിലാണ് ഇവരെ പുറത്തെത്തിച്ചത്. മറിയാമ്മയ്ക്ക് കൂടുതല് ചികിത്സ ആവശ്യമായതിനാല് ഇവരെ പത്തനംതിട്ട ജില്ലാ ആശുപത്രിയിലേക്ക് മാറ്റി. കാലിന് അസുഖമുള്ളതിനാല് ലിഫ്റ്റില് നിന്നും സമയത്തിനുള്ളില് ഇറങ്ങാന് കഴിഞ്ഞിരുന്നില്ല. അസുഖമുള്ള കാല്തന്നെ ലിഫ്റ്റില് കുടുങ്ങുകയും ചെയ്തു. ലിഫ്റ്റിന്റെ സെന്സര് വര്ക്ക് ചെയ്യാത്തതാവാം കാരണമാണെന്നാണ് ഫയര്ഫോഴ്സ് അധികൃതര് പറയുന്നത്.
