കോഴിക്കോട്: തെരുവ് പട്ടിയുടെ കടിയേറ്റ് ചികിത്സയിലായിരുന്ന യുവതി മരിച്ചു. പുറമേരി മുതുവടത്തൂരിലെ കനകത്ത് താഴക്കുനി ബാബുവിന്റെ ഭാര്യ മനുജ (44)യാണ് തെരുവ് പട്ടിയുടെ കടിയേറ്റതിനെ തുടര്‍ന്നുണ്ടായ പേ വിഷബാധയേറ്റ് മരിച്ചത്. ഇക്കഴിഞ്ഞ ഏപ്രില്‍ 13നാണ് യുവതിയെ വീടിന് സമീപത്ത് വെച്ച്‌ തെരുവുനായ ആക്രമിച്ചത്. കാലിലും കൈകള്‍ക്കും സാരമായി പരിക്കേറ്റ യുവതി കോഴിക്കോട് മെഡിക്കല്‍ കോളജില്‍ ചികിത്സയിലായിരുന്നു.
ഇതിനിടെ യുവതി പ്രതിരോധ കുത്തിവെപ്പും സ്വീകരിച്ചിരുന്നു. എന്നാല്‍ ആശുപത്രിയില്‍ നിന്ന് മടങ്ങി എത്തിയ ശേഷം മൂന്ന് ദിവസം മുമ്പ് ശാരീരിക അസ്വസ്ഥതകള്‍ പ്രകടിപ്പിച്ചതോടെ വീണ്ടും മെഡിക്കല്‍ കോളജില്‍ ചികിത്സ തേടുകയായിരുന്നു. ഇതിനിടയില്‍ നടത്തിയ പരിശോധനയിലാണ് മനുജയ്ക്ക് പേ വിഷ ബാധയേറ്റതായി സ്ഥിരീകരിച്ചത്. തുടര്‍ന്ന് ചികിത്സയിലിരിക്കെ ഇന്നലെ രാത്രി 11.30ഓടെയാണ് യുവതി മരണപ്പെട്ടത്.
