ന്യൂഡല്‍ഹി: ലാന്‍ഡ് ഫോണില്‍ നിന്ന് മൊബൈലിലേക്ക് വിളിക്കുമ്പോള്‍ ഇനി നമ്പറിനു മുന്നില്‍ പൂജ്യംകൂടി ചേര്‍ക്കണം. രാജ്യത്ത് ജനുവരി ഒന്നുമുതല്‍ ഇത് നിലവില്‍ വരും. മൊബൈല്‍ ഉപയോക്താക്കള്‍ കൂടിയതിനാല്‍ നമ്പറുകള്‍ 10ല്‍നിന്ന് 11 അക്കമാക്കുന്നതിന്റെ ഭാഗമാണിത്. ഇതിനുള്ള നടപടിയെടുക്കാന്‍ ടെലികോം കമ്പനികള്‍ക്ക് കേന്ദ്ര ടെലികോം മന്ത്രാലയം നിര്‍ദേശം നല്‍കി.
ലാന്‍ഡ് ലൈനുകളില്‍നിന്ന് മൊബൈലിലേക്ക് വിളിക്കുമ്പോള്‍ പൂജ്യം കൂടി ചേര്‍‌ക്കാനായി കഴിഞ്ഞ മേയില്‍ ടെലികോം റെഗുലേറ്ററി അതോറിറ്റി ഓഫ് ഇന്ത്യ (ട്രായ്) നല്‍കിയ നിര്‍ദേശം അംഗീകരിച്ചാണ് കേന്ദ്ര ടെലികോം മന്ത്രാലയം സര്‍ക്കുലര്‍ പുറത്തിറക്കിയത്. മാറ്റത്തോടെ 2544 ദശലക്ഷം പുതിയ നമ്പറുകള്‍കൂടി അനുവദിക്കാന്‍ മൊബൈല്‍ സേവനദാതാക്കള്‍ക്കാവുമെന്നും ട്രായ് പറയുന്നു.
