കാസർകോട് : കാഞ്ഞങ്ങാട് സംസ്ഥാന പാതയിൽ കാറിനുമുകളിലേക്ക് മണ്ണിടിഞ്ഞു. സംസ്ഥാന പാതയിൽ ചെമ്മനാട് കോട്ടരുവത്ത് ആണ് സംഭവം. ഒരു കാറിന് മുകളിലേക്കാണ് മണ്ണിടിഞ്ഞ് വീണത്. രാവിലെ പത്ത് മണിയോടെയാണ് സംഭവം. വാഹനത്തിന് കേടുപാടുകൾ സംഭവിച്ചെങ്കിലും യാത്രക്കാർ പരിക്കേൽക്കാതെ രക്ഷപെട്ടുവെന്നത് ആശ്വാസമാണ്. മണ്ണിടിഞ്ഞ് റോഡിലേക്ക് വീണതോടെ സ്ഥലത്തെ ഗതാഗതം പൂർണമായി സ്തംഭിച്ചു. അതേസമയം കാസർകോട് – കാഞ്ഞങ്ങാട് തീരദേശ പാതയിലെ പള്ളം ഭാഗത്ത് വെള്ളക്കെട്ട്. മഴ കനത്തതോടെയാണ് തീരദേശ പാതയിലെ പള്ളം ഭാഗത്ത് വെള്ളക്കെട്ട് രൂപപ്പെട്ടത്. ഇതോടെ യാത്രക്കാർക്കും നാട്ടുകാർക്കും വലിയ ദുരിതത്തിലായിരിക്കുകയാണ്.
റോഡിന്റെ ഇരുവശങ്ങളിലുമായി മഴവെള്ളം കെട്ടിക്കിടക്കുന്നു. വെള്ളക്കെട്ട് കാരണം ദിവസേന ഗതാഗത തടസ്സവും അപകട സാധ്യതയും വർധിച്ചു. റോഡിലെ കുഴികൾ വെള്ളത്തിനടിയിൽ മറഞ്ഞുകിടക്കുന്നതിനാൽ വാഹനങ്ങൾ കുഴികളിൽ വീണ് നിയന്ത്രണം നഷ്ടപ്പെടുന്ന സംഭവങ്ങൾ പതിവാകുകയാണെന്ന് പ്രദേശവാസികൾ പറയുന്നു.
