തിരുവനന്തപുരം : കേരള നിയമസഭാ തിരഞ്ഞെടുപ്പിന്റെ വോട്ടെണ്ണൽ ദിനത്തിൽ ഏവരും ഉറ്റുനോക്കുന്ന വട്ടിയൂർക്കാവ് മണ്ഡലത്തിൽ എൽ ഡി എഫിന് വൻ വിജയം ഉണ്ടാകുമെന്ന് വി കെ പ്രശാന്ത്. ബിജെപി മണ്ഡലത്തിൽ ശക്തമായ കടന്നുകയറ്റം നടത്തുമോ എന്ന ചോദ്യത്തിന് പ്രസക്തിയില്ലെന്നും എൽഡിഎഫിന്റെ സിറ്റിങ് സീറ്റിൽ ശക്തമായ ഭൂരിപക്ഷത്തോടെ വിജയം സുരക്ഷിതമാണെന്നും അദ്ദേഹം പറഞ്ഞു. വലിയ ആകാംക്ഷയ്ക്കും സസ്പെൻസിനും ഒടുവിൽ വോട്ടുപെട്ടികൾ തുറക്കുമ്പോൾ വട്ടിയൂർക്കാവ് ആരെ തുണയ്ക്കുമെന്നത് നിർണ്ണായകമാണ്.
മുൻപ് ‘മേയർ ബ്രോ’ എന്നും പിന്നീട് ‘എംഎൽഎ ബ്രോ’ എന്നും അറിയപ്പെട്ട വി.കെ. പ്രശാന്ത് ഇത്തവണയും വട്ടിയൂർക്കാവിന്റെ ‘ബ്രോ’ ആയി തുടരുമോ എന്നത് അറിയാൻ ഇനി നിമിഷങ്ങൾ മാത്രമാണ് ബാക്കി നിൽക്കുന്നത്. വോട്ടെണ്ണൽ പുരോഗമിക്കുമ്പോൾ വട്ടിയൂർക്കാവിലും കേരളത്തിലുടനീളവും ആര് ചിരിക്കുമെന്ന് വൈകാതെ വ്യക്തമാകും. കൃത്യം എട്ട് മണിക്ക് തന്നെ വോട്ടെണ്ണൽ ആരംഭിക്കും.
