കോന്നി : കോന്നി മെഡിക്കൽ കോളേജിലെ ശുചിമുറികളുടെ പൈപ്പിൽ ചോർച്ച. വാർഡിലെ ശുചിമുറികളുടെ പൈപ്പ് ലൈനുകൾ ആണ് കാലങ്ങളായി ചോർന്നൊലിക്കുന്നത്. പൈപ്പിൽ നിന്നും വീഴുന്ന മലിന ജലം പൊട്ടി ഒഴുകുന്നത് മെഡിക്കൽ കോളേജ് ആശുപത്രിയുടെ നടുത്തളത്തിലേക്കും. മലിന ജലം ഈ ഭാഗത്ത് കെട്ടികിടക്കുന്നതും കാണാം. പൈപ്പ് ലൈനുകൾ പൊട്ടി ഒഴുകുന്ന വെള്ളം വീണ് ഭിത്തികളുടെ പെയിന്റിങ്ങും ഇളകി പോകുന്നുണ്ട്. കാലങ്ങളായി തുടരുന്ന ഈ അവസ്ഥക്ക് പരിഹാരം കാണുവാനും അധികൃതർക്ക് കഴിഞ്ഞിട്ടില്ല.
നിരവധി രോഗികൾ ഉപയോഗിക്കുന്ന ശുചിമുറിയിലെ മലിന ജലം തറയിലേക്ക് ഒഴുകി ഇറങ്ങുന്നത് രോഗങ്ങൾ പടരുന്നതിനും കാരണമായേക്കാം. മുകളിൽ സ്ഥാപിച്ചിരിക്കുന്ന മേൽകൂരക്കും ചോർച്ചയുള്ളതായി പറയുന്നുണ്ട്. പൈപ്പുകൾ പൊട്ടിയതാവാം ഇതിന് കാരണം എന്നാണ് സംശയം. പൈപ്പിന്റെ അറ്റകുറ്റപണികൾ യഥാസമയം പൂർത്തിയാക്കാതെ വന്നതാണ് തകരാറിന് കാരണം. മെഡിക്കൽ കോളേജിന്റെ ഇടനാഴികളിൽ പലപ്പോഴും വെളിച്ചമില്ലാത്തതും ആശുപത്രിയിൽ എത്തുന്ന രോഗികൾക്കും കൂട്ടിരുപ്പ്കാർക്കും ബുദ്ധിമുട്ട് സൃഷ്ടിക്കുന്നുണ്ട്.
