ന്യൂഡല്ഹി: ഇടത് തീവ്രവാദം രാജ്യത്തെ 11 സംസ്ഥാനങ്ങളിലെ 90 ജില്ലകളെ ബാധിച്ചതായി കേന്ദ്ര സര്ക്കാര്. ഇടതു തീവ്രവാദവുമായി ബന്ധപ്പെട്ട അക്രമങ്ങള് 2019ല് 61 ജില്ലകളില് റിപ്പോര്ട്ട് ചെയ്തു. 2020ല് ഇതുവരെ 46 ജില്ലകളിലും അക്രമം റിപ്പോര്ട്ട് ചെയ്തതായി ആഭ്യന്തര സഹമന്ത്രി ജി. കിഷന് റെഡ്ഡി പറഞ്ഞു.
34 സുരക്ഷാ ഉദ്യോഗസ്ഥര്, 68 സാധാരണക്കാര്, 54 ഇടത് തീവ്രവാദികള് എന്നിവര് ഈ വര്ഷം കൊല്ലപ്പെട്ടിട്ടുണ്ട്. 241 പേര് കീഴടങ്ങി. രാകേഷ് സിന്ഹ എം.പിയുടെ ചോദ്യത്തിന് രേഖാമൂലം നല്കിയ മറുപടിയിലാണ് ഇതുസംബന്ധിച്ച വിവരങ്ങള്.
തീവ്രവാദത്തിനെതിരെ പോരാടാന് സംസ്ഥാനങ്ങള്ക്ക് കേന്ദ്രത്തിന്റെ പിന്തുണയുണ്ട്. കേന്ദ്ര സായുധ പോലീസിനെയും ഹെലികോപ്ടറുകളെയും ലഭ്യമാക്കുന്നുണ്ട്. വിവിധ പദ്ധതികളിലായി മതിയായ സാമ്പത്തിക സഹായവും സംസ്ഥാനങ്ങള്ക്ക് ഇടത് തീവ്രവാദത്തെ നേരിടുന്നതിനായി നല്കുന്നുണ്ടെന്ന് മന്ത്രി അറിയിച്ചു.
