പത്തനംതിട്ട : പമ്പയില് നിന്നും പത്തനംതിട്ടയിലേക്കുള്ള യാത്രക്കിടെ അയ്യപ്പ ഭക്തര് പുള്ളിപ്പുലിയുടെ മുന്നില് അകപ്പെട്ടു. കഴിഞ്ഞ ദിവസം രാത്രിയിലാണ് സംഭവം നടന്നത്. പന്തളം സ്വദേശികളായ അയ്യപ്പ ഭക്തര് ശബരിമല ദര്ശനത്തിന് ശേഷം പമ്പയില് നിന്നും കാറില് പത്തനംതിട്ടയിലേക്ക് മടങ്ങുമ്പോള് വനത്തില് നിന്നും റോഡില് ഇറങ്ങിയ പുലി ഇവര് സഞ്ചരിച്ച വാഹനത്തിന് നേരെ നടന്നടുക്കുകയായിരുന്നു. പുലിയെ കണ്ട് ഭയന്ന അയ്യപ്പ ഭക്തര് വാഹനം ഹെഡ് ലൈറ്റ് തെളിയിച്ച് നിര്ത്തിയതിന് ശേഷം പുലി വനത്തിലേക്ക് കയറാന് കാത്തുനിന്നു. ഏറെ നേരം റോഡില് നിന്ന പുലി പിന്നീട് വനത്തിനുള്ളിലേക്ക് നടന്നു മറയുകയായിരുന്നു.
മണ്ഡലകാലമല്ലാത്തതിനാല് ശബരിമല പാതയില് വന്യ മൃഗങ്ങളുടെ സാന്നിധ്യം പതിവാകുന്നുണ്ട്. പലയിടത്തും വെളിച്ചം കുറവായതിനാല് വാഹന യാത്രക്കാര് വന്യ ജീവികളുടെ അടുത്ത് എത്തിയതിന് ശേഷമായിരിക്കും പലപ്പോഴും അവയുടെ സാന്നിധ്യം അറിയുക. കാട്ടാനയും പോത്തും ശബരിമല പാതയില് നിത്യ സന്ദര്ശകരാണ്.
