പത്തനംതിട്ട : ഏജന്റുമാർക്ക് സാമൂഹ്യസുരക്ഷാ പദ്ധതി നടപ്പാക്കണം എന്നതുൾപ്പെടെയുള്ള ആവശ്യങ്ങൾ ഉന്നയിച്ച് ഓൾ ഇന്ത്യ ജനറൽ ഇൻഷുറൻസ് ഏജന്റ്സ് അസോസിയേഷൻ ജില്ലാ കമ്മിറ്റി നാഷണൽ ഇൻഷുറൻസ്, ന്യൂ ഇന്ത്യ അഷുറൻസ്, യുണൈറ്റഡ് ഇന്ത്യ ഇൻഷുറൻസ് ഓഫീസുകൾക്ക് മുൻപിൽ പ്രതിഷേധദിനം ആചരിച്ചു. തേർഡ് പാർട്ടി ക്ലെയിം വലിയ തോതിൽ വർധിക്കുന്നതിനാൽ പൊതുമേഖല ഇൻഷുറൻസ് കമ്പനികൾ ഇരുചക്രവാഹന ഇൻഷുറൻസ് പുതുക്കാൻ താത്പര്യം കാട്ടുന്നില്ല. വാഹനങ്ങൾക്ക് തേർഡ് പാർട്ടി ഇൻഷുറൻസ് നിർബന്ധമാണെന്നിരിക്കെ കമ്പനികളുടെ നടപടി ശരിയല്ല.
ദീർഘകാല പോളിസികളുടെ കമ്മിഷൻ നൽകുന്നത് വൈകിപ്പിക്കുകയാണെന്നും അസോസിയേഷൻ ആരോപിച്ചു. സംസ്ഥാന വൈസ് പ്രസിഡൻറ് സതീഷ് ബാബു ഉദ്ഘാടനം ചെയ്തു. സംസ്ഥാന ജോയിന്റ് സെക്രട്ടറി ബി. പ്രഭാകുമാരി, സംസ്ഥാന കമ്മിറ്റിയംഗങ്ങളായ റെജി മൂലമുറിയിൽ, പി.കെ. ജയപ്രകാശ്, ജില്ലാ സെക്രട്ടറി സോണി മാത്യു, ജില്ലാ കമ്മിറ്റിയംഗങ്ങളായ ജെറി മാത്യു സാം, പ്രേംകുമാർ തുടങ്ങിയവർ പ്രസംഗിച്ചു.
