തിരുവനന്തപുരം : ആലപ്പുഴ എം എല്‍ എ പി.പി ചിത്തരഞ്ജനെതിരെ വധഭീഷണി. തിരുവനന്തപുരത്തെ എം എല്‍ എ ഹോസ്റ്റലിലാണ് ഭീഷണിക്കത്ത് ലഭിച്ചത്. എം എല്‍ എയുടെ കയ്യും കാലും വെട്ടി ആലപ്പുഴ നഗരസഭയ്ക്ക് മുന്നില്‍ വെയ്ക്കുമെന്നാണ് ഭീഷണി. കുടുംബാംഗങ്ങള്‍ക്ക് വിഷം നല്‍കി കൊല്ലുമെന്നും കത്തില്‍ ഭീഷണി മുഴക്കിയിട്ടുണ്ട്. ഒന്‍പത് ദിവസത്തിനകം ഇന്ത്യ വിടണമെന്നും കത്തില്‍ പറയുന്നു.
തലശ്ശേരി എം.എല്‍.എ എ.എന്‍ ഷംസീറിനും ഡി വൈ എഫ് ഐ സംസ്ഥാന സെക്രട്ടറി എ.എ റഹീമിനുമെതിരെയും ഭീഷണിയുണ്ട്. മൂവാറ്റുപുഴ സ്വദേശി ബെന്നി മാര്‍ട്ടിന്‍ എന്ന പേരിലാണ് കത്ത് അയച്ചിരിക്കുന്നത്. ഭീഷണിയെ തുടര്‍ന്ന് പി.പി ചിത്തരഞ്ജന്‍ മുഖ്യമന്ത്രിക്കും നിയമസഭാ സ്‌പീക്കര്‍ക്കും പരാതി നല്‍കി.
