പലരും നേരിടുന്ന പ്രധാന പ്രശ്നങ്ങളിലൊന്നാണ് മുടി കൊഴിച്ചിൽ. അമിതമായി മുടി കൊഴിഞ്ഞ് പോകുന്നതിന് പല കാരണങ്ങളുണ്ടെന്ന് തന്നെ പറയാം. ജീവിതശൈലി, ഭക്ഷണശൈലി എന്നിവയെല്ലാം മുടി കൊഴിച്ചിലിൻ്റെ പ്രധാന കാരണങ്ങളാണ്. ഇത് മാറ്റാൻ പ്രകൃതിദത്തമായ പരിഹാരങ്ങളാണ് എപ്പോഴും നല്ലത്. വീട്ടിലെ അടുക്കളയിലുള്ള പല ചേരുവകൾ മുടി കൊഴിച്ചിൽ മാറ്റാൻ സഹായിക്കുന്നവയാണ്. ഇത്തരത്തിൽ വീട്ടിൽ തന്നെ ചെയ്യാൻ കഴിയുന്ന ഒരു സിമ്പിൾ പരിഹാര മാർഗം നോക്കാം. വില കുറവിൽ മുടി വളരാൻ സഹായിക്കുന്ന ഒന്നാണ് കറിവേപ്പില. എല്ലാ വീട്ടിലെയും അടുക്കളയിൽ കറിവേപ്പില വളരെ സുലഭമായി ലഭ്യമാണ്. ഇവയിൽ അടങ്ങിയിരിക്കുന്ന ആൻ്റി ഓക്സിഡൻ്റുകളും പ്രോട്ടീനുകളും മുടി വളരാൻ വളരെയധികം സഹായിക്കാറുണ്ട്. മുടിയ്ക്ക് നല്ല കറുപ്പ് നിറവും അതുപോലെ ബലവും ആരോഗ്യവും നൽകാൻ ഇത് ഏറെ സഹായിക്കും. മിക്കവരും എണ്ണയിൽ കറിവേപ്പില ചേർത്ത് ഉപയോഗിക്കാറുണ്ട്. മുടികൊഴിച്ചിലും താരനും മാറ്റാൻ ഏറെ നല്ലതാണ് ഉലുവ. ഇതിൽ അടങ്ങിയിരിക്കുന്ന അമിനോ ആസിഡുകളാണ് മുടി വളരാൻ ഏറ്റവും അധികം സഹായിക്കുന്നത്. തലയോട്ടിയിലെ ചൊറിച്ചിൽ, താരൻ, മറ്റ് പ്രശ്നങ്ങൾ എന്നിവയെല്ലാം ഇല്ലാതാക്കാൻ ഉലുവ സഹായിക്കാറുണ്ട്. വൈറ്റമിനുകളും ആൻ്റി ഓക്സിഡൻ്റുകളാലും സമ്പുഷ്ടമാണ് ഉലുവ. മുടിയിൽ ശ്രദ്ധിക്കുന്നവർ തീർച്ചയായും ഉലുവയെ മറക്കരുത്.
മുടി കൊഴിച്ചിൽ മാറ്റി മുടി തഴച്ച് വളരാൻ സഹായിക്കുന്ന അടുക്കളയിലെ പ്രധാനിയാണ് സവാള. ഇതിൽ ധാരാളമായി സൾഫർ അടങ്ങിയിട്ടുണ്ട്. തലയോട്ടിയിലെ രക്തയോട്ടം കൂട്ടി മുടി വളരാൻ ഈ സൾഫർ ഏറെ സഹായിക്കും. ശിരോ ചർമ്മത്തിലുണ്ടാകുന്ന താരൻ പോലുള്ള പ്രശ്നങ്ങൾ മാറ്റാനും സൾഫർ ഏറെ നല്ലതാണെന്ന് തന്നെ പറയാം. വിപണിയിൽ ലഭിക്കുന്ന പല ഉത്പ്പന്നങ്ങളിലും സവാള ഒരു പ്രധാന ചേരുവയായി ഇപ്പോൾ മാറിയിട്ടുണ്ട്. അടി കട്ടിയുള്ള ഒരു പാത്രം അടുപ്പിൽ വയ്ക്കുക. ഇതിലേക്ക് 1 ടീ സ്പൂൺ ഉലുവ, 10 മുതൽ 12 കറിവേപ്പില, സവാളയുടെ അര ഭാഗം എന്നിവ ചേർക്കുക. ഇനി ഒരു കപ്പ് വെള്ളവുമൊഴിച്ച് നന്നായി തിളപ്പിക്കുക. 5 മിനിറ്റ് തിളപ്പിച്ച് വെള്ളത്തിൻ്റെ നിറം മാറി കഴിയുമ്പോൾ തീ നിർത്താം. ഇനി ഇതിലേക്ക് ഒരു ടേബിൾ സ്പൂൺ കടുകെണ്ണ കൂടി ചേർത്ത് നന്നായി യോജിപ്പിക്കുക. ഇനി ഈ മിശ്രിതം കൈ കൊണ്ടോ അല്ലെങ്കിൽ കോട്ടൺ ബോൾ കൊണ്ടോ തലയോട്ടിയിൽ നന്നായി തേച്ച് പിടിപ്പിക്കുക. 30 മിനിറ്റിന് ശേഷം വീര്യം കുറഞ്ഞ ഷാംപൂ ഉപയോഗിച്ച് കഴുകി വ്യത്തിയാക്കാം. ആഴ്ചയിൽ 3 ദിവസം ഇത് ചെയ്യാവുന്നതാണ്.
