കോട്ടയം: എക്സൈസിനെയും പോലീസിനെയും കബളിപ്പിച്ച്‌ ഏറെനാളായി അനധികൃത മദ്യവില്‍പന നടത്തിയ പ്രതി അറസ്റ്റില്‍. കാഞ്ഞിരം മുല്ലശ്ശേരിയില്‍ എം.ആര്‍. ബിനുവിനെയാണ് (45) ഓണം സ്പെഷ്യല്‍ ഡ്രൈവിന്റെ ഭാഗമായി നടത്തിയ പരിശോധനയില്‍ പിടികൂടിയത്. 1999ല്‍ 10 പേര്‍ മരിച്ച വ്യാജചാരായക്കേസിലെ പ്രതിയാണിയാള്‍.
വര്‍ഷങ്ങളായി മേഖലയില്‍ അനധികൃത മദ്യവില്‍പന നടത്തുകയായിരുന്നു. പലവട്ടം പരാതി ലഭിച്ചിട്ടും പ്രതിയെ പിടികൂടാന്‍ കഴിഞ്ഞിരുന്നില്ല. മദ്യം വാങ്ങാനെന്ന മട്ടില്‍ എക്സൈസ് സംഘം പ്രതിയെ സമീപിക്കുകയായിരുന്നു. എന്നാല്‍, എക്സൈസ് ആണെന്ന് മനസ്സിലായതോടെ ഇയാള്‍ കത്തിവീശി ആക്രമിക്കാന്‍ ശ്രമിച്ചു. ഏറെ നേരത്തേ പരിശ്രമത്തിനൊടുവില്‍ കീഴ്പ്പെടുത്തി.
വീടിന് പിന്നിലെ പാടശേഖരത്തില്‍ വെള്ളത്തിനടിയില്‍ ഒളിപ്പിച്ചനിലയില്‍ ഏഴുലിറ്റര്‍ മദ്യം കണ്ടെത്തി. കുത്തുകേസിലും പ്രതിയാണ് ഇയാളെന്ന് കോട്ടയം എക്സൈസ് സര്‍ക്കിള്‍ ഇന്‍സ്പെക്ടര്‍ മോഹനന്‍ നായര്‍ പറഞ്ഞു. കോടതിയില്‍ ഹാജരാക്കി റിമാന്‍ഡ് ചെയ്തു. പ്രിവന്‍റിവ് ഓഫീസര്‍ പി.എസ്. സുരേഷ്, സിവില്‍ പോലീസ് ഓഫീസര്‍ നിസി ജേക്കബ് എന്നിവരും പരിശോധനയില്‍ പങ്കെടുത്തു.
