കായംകുളം : ലോക്ഡൗണ്‍ കാല വില്‍പ്പന ലക്ഷ്യമാക്കി തീവണ്ടിയില്‍ മദ്യം കടത്തിയ രണ്ട് യുവതികള്‍ റെയില്‍വേ പോലീസിന്റെ പിടിയിലായി. തിരുവനന്തപുരം സ്വദേശികളായ ദീപി (33), ഷീജ (23) എന്നിവരാണ് കര്‍ണാടക നിര്‍മ്മിത വിദേശ മദ്യവുമായി പിടിയിലായത്.
ബംഗളരുവില്‍ നിന്നും തിരുവനന്തപുരത്തേക്കുള്ള ഐലന്റ് എക്സ്‌ പ്രസ്സിലായിരുന്നു ഇവരുടെ യാത്ര. സംശയത്തെ തുടര്‍ന്ന് ബാഗ് പരിശോധിച്ചപ്പോഴാണ് 750 മില്ലി ലിറ്ററിന്റെ നാല് തരത്തിലുള്ള 62 കുപ്പി മദ്യശേഖരം കണ്ടെത്തിയത്. കുറഞ്ഞ വിലയില്‍ കര്‍ണാടകയില്‍ നിന്നും വാങ്ങുന്ന മദ്യം കുപ്പിക്ക് 2,500 രൂപ മുതല്‍ 3,000 രൂപ വരെ നിരക്കിലാണ് വിറ്റഴിച്ചിരുന്നത്.
സ്ത്രീകളെ ഉപയോഗിച്ച്‌ മദ്യകടത്ത് നടത്തുന്ന സംഘമാണ് ഇതിന് പിന്നിലെന്ന് സംശയിക്കുന്നു. ഇവര്‍ക്കായി അന്വേഷണം ഊര്‍ജിതപ്പെടുത്തിയിട്ടുണ്ട്. എസ്.ഐ അരുണ്‍ നാരായണ്‍, എ.എസ്.ഐ ദിലീപ്, സീനിയര്‍ സിവില്‍ പോലീസ് ഓഫിസര്‍മാരായ ശാലിനി കേശവന്‍, മുരളീധരന്‍പിള്ള, സീന്‍കുമാര്‍, സിവില്‍ പോലീസ് ഒാഫീസര്‍മാരായ ജോബി, ജോര്‍ജ്, ബിലു എന്നിവരാണ് റെയ്ഡിന് നേതൃത്വം നല്‍കിയത്.
