പത്തനംതിട്ട : പോലീസ് സ്റ്റേഷനടുത്തുള്ള ബീവറേജ് പ്രീമിയം കൗണ്ടറിൽ നിന്ന് വിലക്കൂടിയ രണ്ടരലിറ്റർ മദ്യം മോഷ്ടിച്ചവരുടെ സിസിടിവി ദൃശ്യങ്ങൾ പുറത്ത്. സിസിടിവിയിൽ കുടുങ്ങിയ മോഷ്ടാക്കൾക്കായി പത്തനംതിട്ട പോലീസ് അന്വേഷണം ആരംഭിച്ചു. ഈ മാസം 21-ാം തിയതിയാണ് പത്തനംതിട്ട പോലീസ് സ്റ്റേഷന് സമീപത്തെ ബീവറേജ് പ്രീമിയം കൗണ്ടറിൽ മോഷണം നടന്നത്. കൗണ്ടറിലെത്തി ജീവനക്കാരുമായി വാക്കു തർക്കമുണ്ടാക്കി ശ്രദ്ധതിരിച്ച ശേഷമായിരുന്നു മോഷണം നടത്തിയത്.
കൗണ്ടറിലെത്തിയ മോഷ്ടാക്കൾ ജീവനക്കാരുമായി ആദ്യം മനപൂർവ്വം തർക്കമുണ്ടാക്കി. ഈ സമയം മോഷ്ടാക്കളിലൊരാൾ വിലക്കൂടിയ മദ്യം മോഷ്ടിച്ചു. പിന്നീട് കൗണ്ടറിലെത്തി ജീവനക്കാർക്ക് കൈയ്യും കൊടുത്ത ശേഷമാണ് മോഷ്ടാക്കൾ പോയത്. വൈകീട്ട് കട അടയ്ക്കുന്നതിന് മുൻപ് സ്റ്റോക്ക് പരിശോധിച്ചപ്പോഴാണ് മോഷണ വിവരം ജീവനക്കാർ അറിയുന്നത്. തുടർന്ന് സിസിടിവി പരിശോധിച്ചപ്പോഴാണ് മോഷണ ദൃശ്യങ്ങൾ ലഭിച്ചത്. ഇതോടെ ദൃശ്യങ്ങൾ സഹിതം മാനേജർ പത്തനംതിട്ട പോലീസിൽ പരാതിയും നൽകി. രണ്ട് മോഷ്ടാക്കൾക്കായി അന്വേഷണം തുടങ്ങിയതായി പോലീസ് അറിയിച്ചു.
