ഇടുക്കി: ഇടുക്കിയില് വിനോദ സഞ്ചാരികളായ ദമ്പതികളെ ആക്രമിക്കുകയും വാഹനം തല്ലിത്തകര്ക്കുകയും ചെയ്ത യുവാവിനെ നാട്ടുകാര് പിടികൂടി പോലീസില് ഏല്പ്പിച്ചു. ഒരാള് ഓടി രക്ഷപെട്ടു. മാട്ടുപ്പെട്ടി എസ്റ്റേറ്റില് നെറ്റിമേട് സ്വദേശി പി ഗോകുല് (21) നെയാണ് മൂന്നാര് പോലീസ് അറസ്റ്റ് ചെയ്തത്. ഇവരുടെ ആക്രമണത്തില് പരിക്കേറ്റ കുമളി സ്വദേശി സലീം (54), ഭാര്യ അനീഷ (46) എന്നിവരെ ടാറ്റാ ഹൈറേഞ്ച് ആശുപത്രിയില് പ്രവേശിപ്പിച്ചു. ഇന്നലെ വൈകിട്ട് മാട്ടുപ്പെട്ടി ബോട്ടിങ് സെന്ററിന് സമീപത്തെ റോഡില് വച്ചാണ് സംഭവം.
സലീമും ഭാര്യയും സുഹൃത്ത് കോട്ടയം തിരുവാതുക്കല് സ്വദേശി സുല്ഫി, ഭാര്യ മജ്ജുവും ടോപ് സ്റ്റേഷന് സന്ദര്ശനം കഴിഞ്ഞ് മടങ്ങി വരികയായിരുന്നു. പിന്നാലെ ബൈക്കില് വന്ന യുവാക്കള് അതിവേഗം എത്തി, ഇവര് സഞ്ചരിച്ചിരുന്ന ജീപ്പ് തടഞ്ഞു. കാര്യം മനസിലാകും മുമ്പ് തെറി പറയുകയും, തങ്ങളുടെ ബൈക്കില് ഇടിച്ചിട്ട് നിര്ത്താതെ പോയി എന്നും ആരോപിച്ച് ആക്രമണം നടത്തുകയായിരുന്നു. ബൈക്ക് നിര്ത്തി ഇറങ്ങിയ യുവാക്കള് ആദ്യം ഇവരുടെ ജീപ്പ് തല്ലിത്തകര്ത്തു. പിന്നാലെ പിന്നിലിരുന്ന സലീമിനെയും ഭാര്യയെയും അക്രമിക്കുകയും ചെയ്തു. സംഭവത്തെ തുടര്ന്ന് ഓടിക്കൂടിയ നാട്ടുകാരാണ് ഗോകുലിനെ പിടികൂടിയത്.
