കോന്നി : അരുവാപ്പുലം പഞ്ചായത്ത് കടവില് കുഴിക്കല് ഭാഗത്ത് പുലി ഇറങ്ങിയതായി അഭ്യൂഹം. കഴിഞ്ഞ ദിവസമാണ് ഈ പ്രദേശത്ത് നാട്ടുകാര് പുലിയെ കണ്ടതായി പറയുന്നത്. കുമ്മണ്ണൂര് ഫോറസ്റ്റ് സ്റ്റേഷന് പരിധിയില് വരുന്ന പ്രദേശമാണ് ഇവിടം. കഴിഞ്ഞ ദിവസം കുഴിക്കല് ഭാഗത്ത് കൂടി പുലി നടന്നുപോകുന്നത് കണ്ടതായാണ് പ്രദേശവാസികള് പറയുന്നത്. നാട്ടുകാര് പുലിയെ കണ്ടതായി അറിയിച്ചതിനെ തുടര്ന്ന് കുമ്മണ്ണൂര് ഫോറസ്റ്റ് സ്റ്റേഷനിലെ വനപാലകര് സ്ഥലത്തെത്തി പരിശോധന നടത്തി. എന്നാല് പുലിയുടെ സാന്നിധ്യം സ്ഥിരീകരിക്കാന് കഴിഞ്ഞിട്ടില്ല എന്നാണ് വനപാലകര് പറയുന്നത്. കാല്പാടുകളും കണ്ടെത്തിയിട്ടില്ല.
അരുവാപ്പുലം പഞ്ചായത്തിലെ ഊട്ടുപാറയില് പുലി മാസങ്ങള്ക്ക് മുന്പ് വളര്ത്ത് നായയെ പിടിച്ചിരുന്നു. നാട്ടുകാരുടെ ആവശ്യത്തെ തുടര്ന്ന് വനം വകുപ്പ് ഇവിടെ കൂട് സ്ഥാപിച്ചിരുന്നുവെങ്കിലും പുലിയെ പിടികൂടുവാന് കഴിഞ്ഞിരുന്നില്ല. കഴിഞ്ഞ കുറച്ചു കാലയളവിനുള്ളില് കാട്ടാന ശല്യം കാരണം നിരവധി കര്ഷകരുടെ കാര്ഷിക വിളകള് നശിപ്പിക്കപ്പെട്ടിരുന്നു. അരുവാപ്പുലം പഞ്ചായത്തില് സ്വകാര്യ വ്യക്തികളുടെ കൃഷിയിടങ്ങളില് കാലങ്ങളായി നിലനില്ക്കുന്ന കാടുകള് വെട്ടി മാറ്റാത്തതും വന്യ മൃഗങ്ങളുടെ ശല്യം വര്ദ്ധിപ്പിക്കുന്നു.
