തിരുവനന്തപുരം : ബലിപെരുന്നാള്‍ പ്രമാണിച്ച്‌ സംസ്ഥാനത്ത് ഇന്ന് മുതല്‍ കുടുതല്‍ ഇളവുകള്‍. ഇന്ന് വാരാന്ത്യ ലോക്ക്ഡൗണില്‍ ഇളവുകളുണ്ട്. അവശ്യവസ്തുക്കള്‍ വില്‍ക്കുന്ന കടകള്‍ക്ക് പുറമേ തുണിക്കട, ചെരുപ്പുകട, ഇലക്‌ട്രോണിക് ഷോപ്പുകള്‍, ഫാന്‍സി ഷോപ്പുകള്‍, സ്വര്‍ണക്കട എന്നിവയും ഇന്ന് തുറക്കും. രാത്രി എട്ടുവരെ ഈ കടകള്‍ പ്രവര്‍ത്തിക്കാം.
പെരുന്നാളിനോട് അനുബന്ധിച്ച്‌ ഇളവുകള്‍ വേണമെന്ന വ്യാപാരികളുടെ ആവശ്യം കൂടി പരിഗണിച്ചാണ് വാരാന്ത്യ ലോക്ക്ഡൗണില്‍ ഞായറാഴച്ച ഇളവ് നല്‍കിയത്. നിയന്ത്രണങ്ങളില്‍ ഇളവുകള്‍ നിലവില്‍ വരുന്ന സാഹചര്യത്തില്‍ കോവിഡ് മാനദണ്ഡം പാലിക്കുന്നുവെന്ന് ഉറപ്പാക്കണമെന്ന് ഡി.ജി.പി അനില്‍കാന്ത് പോലീസ് ഉദ്യോഗസ്ഥര്‍ക്ക് നിര്‍ദേശം നല്‍കിയിട്ടുണ്ട്.
അതേസമയം സംസ്ഥാനത്ത് എല്ലാ കടകളും തുറക്കാം. അതിതീവ്ര വ്യാപനമുള്ള ഡി മേഖലയിലും ഈ ഇളവ് ബാധകമാണ്. ഇവിടങ്ങളില്‍ നിലവില്‍ അവശ്യവസ്തുക്കളുടെ കടകള്‍ മാത്രമേ തുറക്കാന്‍ അനുമതിയുണ്ടായിരുന്നുള്ളൂ. എന്നാല്‍, ബക്രീദ് കണക്കിലെടുത്ത് എല്ലാ കടകള്‍ക്കും പ്രവര്‍ത്തിക്കാന്‍ അനുമതി നല്‍കിയതായി മുഖ്യമന്ത്രി പിണറായി വിജയന്‍ വാര്‍ത്തസമ്മേളനത്തില്‍ അറിയിച്ചു.
എ, ബി, സി മേഖലകളില്‍ ഞായര്‍മുതല്‍ ചൊവ്വവരെ കടതുറക്കാന്‍ നേരത്തേ അനുമതി നല്‍കിയിരുന്നു. ബക്രീദിന് കുറഞ്ഞത് 40 പേര്‍ക്കെങ്കിലും പള്ളികളില്‍ പ്രാര്‍ഥന നടത്തുന്നതിനുള്ള അനുമതി നല്‍കണമെന്ന് മുസ്ലിം സംഘടനകള്‍ ആവശ്യപ്പെട്ടിരുന്നു. അതുകൂടി പരിഗണിച്ചാണ് തീരുമാനം.മുഖ്യമന്ത്രിയുടെ അധ്യക്ഷതയില്‍ ചേര്‍ന്ന വിദഗ്ധസമിതി യോഗമാണ് തീരുമാനങ്ങളെടുത്തത്.
അതേസമയം മദ്യശാലകള്‍ ഇന്ന് തുറക്കില്ല. സര്‍ക്കാര്‍ വിജ്ഞാപനത്തില്‍ മദ്യശാലകള്‍ക്ക് ഇളവ് ഇല്ലാത്തതിനാലാണ് തീരുമാനം.എത്ര പരിമിതമായാലും ലോക്ക്ഡൗണ്‍ വലിയ സാമ്പത്തിക സാമൂഹിക പ്രത്യാഘാതങ്ങളുണ്ടാക്കുന്നുണ്ടെന്ന് മുഖ്യമന്ത്രി പറഞ്ഞു. എന്നാല്‍, ഗൗരവതരമായ സാഹചര്യം മറികടക്കാന്‍ നിയന്ത്രണങ്ങള്‍ കൂടിയേ തീരൂ.
