തിരുവനന്തപുരം: ദുരിതാശ്വാസ നിധി തട്ടിപ്പ് കേസില് മുഖ്യമന്ത്രി പിണറായി വിജയനെതിരായ പരാതിയില് ലോകായുക്ത നാളെ വിധി പറയും. കേസില് വാദം പൂര്ത്തിയായി ഒരു വര്ഷം കഴിഞ്ഞിട്ടും വിധി പറഞ്ഞിരുന്നില്ല. പരാതിക്കാരന് ഹൈക്കോടതിയെ സമീപിച്ചതിനെ തുടര്ന്നാണ് കേസ് പരിഗണിക്കുന്നത്. മുഖ്യമന്ത്രിയും ഒന്നാം പിണറായി സര്ക്കാരിലെ മന്ത്രിമാരും ഫണ്ട് വകമാറ്റിയെന്നാണ് കേസ്. ലോകായുക്തയുടെ വിധി പ്രതികൂലമായാല് മുഖ്യമന്ത്രിക്ക് കനത്ത തിരിച്ചടിയാകും എന്നാണ് വിലയിരുത്തല്. വാദം കേള്ക്കുന്നതിനിടെ ലോകായുക്ത സര്ക്കാരിനെ രൂക്ഷമായി വിമര്ശിച്ചിരുന്നു.
അന്തരിച്ച ചെങ്ങന്നൂര് മുന് എം എല് എ, കെ കെ രാമചന്ദ്രന്റെയും അന്തരിച്ച എന്സിപി നേതാവ് ഉഴവൂര് വിജയന്റെയും കുടുംബങ്ങള്ക്കും, കോടിയേരി ബാലകൃഷ്ണന്റെ അകമ്പടി വാഹനം അപകടത്തില് പെട്ട് മരിച്ച പോലീസുകാരന്റെ കുടുംബത്തിനും ദുരിതാശ്വാസ നിധിയില് നിന്നും പണം നല്കിയതിനെ തുടര്ന്നാണ് പരാതി നല്കപ്പെട്ടത്.
