തിരുവനന്തപുരം : വിവാഹ സംബന്ധമായ ആർഭാടത്തിനും ധൂർത്തിനും പിഴ ശിക്ഷ ഉൾപ്പെടെ ഉറപ്പാക്കുന്ന കരട് ബിൽ കേരള വനിതാ കമ്മിഷൻ സർക്കാരിന്റെ പരിഗണനയ്ക്കായി സമർപ്പിച്ചു. വിവാഹത്തോട് അനുബന്ധിച്ചുള്ള ആർഭാടവും ധൂർത്തും നിരോധിക്കാനുള്ള വ്യവസ്ഥകൾ ഉൾപ്പെടുത്തിയിട്ടുണ്ട്. വിവിധ ജാതി, മത സമൂഹങ്ങളിൽ വിവാഹത്തിന് അനുബന്ധമായോ വിവാഹത്തിനു മുൻപോ ശേഷമോ നടക്കുന്ന എല്ലാ ചടങ്ങുകളിലെയും ധൂർത്തും ആഡംബരവും ഈ ബില്ലിന്റെ പരിധിയിൽ വരും.
ബില്ലിന്റെ കരട് തയാറാക്കാൻ വനിതാ കമ്മിഷനെ നേരത്തെ ചുമതലപ്പെടുത്തിയിരുന്നു. വിവിധ ജനവിഭാഗങ്ങൾക്കിടയിൽ നിലനിൽക്കുന്നതും സാമൂഹിക വിപത്തായി വളർന്നു കൊണ്ടിരിക്കുന്നതുമായ വിവാഹ ധൂർത്തും ആർഭാടവും ഗുരുതര സാമ്പത്തിക സാമൂഹിക പ്രത്യാഘാതങ്ങൾ സൃഷ്ടിക്കുന്നതായി കമ്മിഷൻ ചൂണ്ടിക്കാട്ടി.
