തിരുവനന്തപുരം : തിരഞ്ഞെടുപ്പിലുണ്ടായ കനത്ത തിരിച്ചടി പരസ്യമായി സമ്മതിച്ച് മുതിർന്ന സി.പി.ഐ.എം നേതാവ് എം.എം മണി. തോൽവി സമ്മതിക്കാതിരിക്കുന്നത് ബുദ്ധിശൂന്യതയാണെന്നും എന്തുക്കൊണ്ട് തോറ്റു എന്നതിനെക്കുറിച്ച് പാർട്ടി വിശദമായ പരിശോധന നടത്തുമെന്നും അദ്ദേഹം വ്യക്തമാക്കി. ഞങ്ങൾ തോറ്റു എന്നുള്ളത് സത്യമാണ്. അത് സമ്മതിക്കാതെ ഞങ്ങൾ തോറ്റില്ലെന്ന് പറഞ്ഞാൽ ഞങ്ങൾക്ക് തലയ്ക്ക് സുഖമില്ലെന്ന് നിങ്ങൾ പറയില്ലേ എന്ന് അദ്ദേഹം ചോദിച്ചു. ജനങ്ങളുടെ തീരുമാനം എന്തായാലും അത് അംഗീകരിക്കുന്നു. എന്തുകൊണ്ടാണ് പരാജയം സംഭവിച്ചത് എന്നതിനെക്കുറിച്ച് പാർട്ടി കാര്യകാരണങ്ങൾ പരിശോധിക്കുമെന്നും അദ്ദേഹം പറഞ്ഞു.
പത്ത് വർഷം ഭരണപക്ഷത്തിരുന്നതിന് ശേഷം ഇനി പ്രതിപക്ഷത്തിരിക്കുന്നത് പാർട്ടിയെ ശക്തിപ്പെടുത്താൻ സഹായിക്കുമെന്ന് മണി അഭിപ്രായപ്പെട്ടു. കുറച്ചു കാലം പ്രതിപക്ഷത്തിരിക്കുന്നത് നല്ലതാണെന്നും അത് പാർട്ടിയുടെ വളർച്ചയ്ക്ക് ഗുണം ചെയ്യുമെന്നും അദ്ദേഹം പറഞ്ഞു. പാർട്ടി നേതൃത്വത്തിൽ എന്തെങ്കിലും വീഴ്ചകൾ ഉണ്ടെങ്കിൽ അത് തിരുത്തുമെന്നും ഇതിനായി സ്വയം വിമർശനം നടത്തുന്ന പാർട്ടിയാണ് തങ്ങളുടേതെന്നും അദ്ദേഹം വ്യക്തമാക്കി.
