തിരുവനന്തപുരം: മാനനഷ്ട കേസില് ശിക്ഷിക്കപ്പെട്ട വയനാട് എംപി രാഹുല് ഗാന്ധിയ്ക്ക് പിന്തുണയുമായി സിപിഎം നേതാവും മുന് എംഎല്എയുമായ എം സ്വരാജ്. രാഹുല് ഗാന്ധിയുടെ പ്രസംഗം ഒരു സമുദായത്തെയും അവഹേളിക്കാന് ഉദ്ദേശിച്ചുള്ളതല്ലെന്നും പ്രധാനമന്ത്രിയെയും അഴിമതിയെയും വിമര്ശിക്കുക എന്ന ലക്ഷ്യമാണ് പ്രസംഗത്തിനുള്ളതെന്നും പകലു പോലെ വ്യക്തമാണെന്നും അദ്ദേഹം പറഞ്ഞു. ഫേസ്ബുക്ക് കുറിപ്പിലൂടെയാണ് രാഹുലിന് പിന്തുണയുമായി എം സ്വരാജ് എത്തിയത്.
വിയോജിപ്പുകള്ക്കും വിമര്ശനങ്ങള്ക്കും പ്രതിഷേധങ്ങള്ക്കും വിലങ്ങു വീഴുമ്പോള് കേള്ക്കുന്ന ശബ്ദം ഫാസിസത്തിന്റെ കാലൊച്ച തന്നെയാണ്. കൊന്നു കൊണ്ടിരിക്കുന്നത് ഇന്ത്യയെത്തന്നെയാണ്. രാജ്യം നേരിടുന്ന വെല്ലുവിളിയുടെ ആഴം കേരളത്തിലെ കോണ്ഗ്രസുകാര്ക്ക് മനസിലായാലും ഇല്ലെങ്കിലും എല്ലാ ജനാധിപത്യവാദികളും പ്രതിഷേധമുയര്ത്തേണ്ട സന്ദര്ഭമാണിതെന്നും അദ്ദേഹം പറഞ്ഞു. അതേസമയം മാനനഷ്ട കേസില് ശിക്ഷിക്കപ്പെട്ട രാഹുല് ഗാന്ധിയെ അയോഗ്യനാക്കി ലോക്സഭാ സെക്രട്ടേറിയേറ്റ് വിജ്ഞാപനം പുറപ്പെടുവിച്ചു. രാഹുല് ഗാന്ധി എംപിയെ ഗുജറാത്തിലെ സൂറത്ത് കോടതി രണ്ടുവര്ഷം തടവിനാണ് ശിക്ഷിച്ചത്. ഗുജറാത്തിലെ ബിജെപി എംഎല്എ പൂര്ണേഷ് മോദി നല്കിയ പരാതിയില് സൂറത്ത് ചീഫ് ജുഡീഷ്യല് മജിസ്ട്രേട്ട് എച്ച് എച്ച് വര്മയാണ് ശിക്ഷ വിധിച്ചത്. 2019 ലോക്സഭാ തെരഞ്ഞെടുപ്പിന് മുന്നോടിയായി കര്ണാടകത്തിലെ കോലാറില് നടത്തിയ പ്രസംഗത്തിലെ ‘എല്ലാ കള്ളന്മാര്ക്കും മോദിയെന്ന പൊതുപേരുണ്ടായത് എങ്ങനെ?’- എന്ന പരാമര്ശമാണ് കേസിന് ആധാരം.