തിരുവനന്തപുരം : സംസ്ഥാന ട്രഷറിയിൽ പൂച്ച പെറ്റുകിടക്കുകയാണെന്ന പ്രതിപക്ഷ നേതാവ് വി.ഡി. സതീശന്റെ പരിഹാസത്തിന് മറുപടിയുമായി മുതിർന്ന സി പി ഐ എം നേതാവ് എം വി ജയരാജൻ. ട്രഷറിയിൽ പൂച്ച പ്രസവിച്ചുകിടക്കുകയാണെങ്കിൽ അതിലെ ഒരു ‘കുഞ്ഞു പൂച്ചയെ’ എടുത്താണ് മെയ് 25-ന് 1070 കോടി രൂപ സാമൂഹ്യ സുരക്ഷാ പെൻഷനായി വിതരണം ചെയ്യുന്നതെന്ന് അദ്ദേഹം പറഞ്ഞു. ബാക്കിയുള്ള ‘പൂച്ചകൾ’ ഇനിയും ട്രഷറിയിലുണ്ടെന്നും, പ്രഖ്യാപനങ്ങൾ നടത്തുമ്പോൾ പണമായി ഉപയോഗിക്കാൻ വേണ്ടിയാണ് ഇതെന്നും പരിഹാസരൂപേണ അദ്ദേഹം പറഞ്ഞു. കോൺഗ്രസ് നൽകുന്ന വാഗ്ദാനങ്ങൾ നടപ്പിലാക്കാനുള്ളതല്ലെന്നും അവ വെറും ‘ജലരേഖകൾ’ മാത്രമാണെന്നും അദ്ദേഹം വിമർശിച്ചു.
വയനാട് ദുരന്തബാധിതർക്ക് വീട് വെച്ചുനൽകുമെന്ന കോൺഗ്രസിന്റെ ഇപ്പോഴത്തെ വാഗ്ദാനവും ഇത്തരത്തിൽ വിശ്വസിക്കാൻ കൊള്ളാത്തതാണെന്ന് അദ്ദേഹം ആരോപിച്ചു. സി.പി.എമ്മിലെ സ്വയംവിമർശനവും തിരുത്തലും പാർട്ടിക്കുള്ളിൽ മുഖ്യമന്ത്രി പിണറായി വിജയനും സംസ്ഥാന സെക്രട്ടറിക്കുമെതിരെ ഉയരുന്ന വിമർശനങ്ങളെക്കുറിച്ചും അദ്ദേഹം പ്രതികരിച്ചു.
