മലപ്പുറം : തളിപ്പറമ്പിലെ സിപിഎം സ്ഥാനാര്ത്ഥിത്വത്തില് ഔചിത്യം പാലിക്കണമായിരുന്നുവെന്ന് സിപിഎം ജനറല് സെക്രട്ടറി എംഎ ബേബി. മലപ്പുറത്ത് 29ാമത് ഇഎംഎസിന്റെ ലോകം ദേശീയ സെമിനാര് സമാപന സമ്മേളനത്തിന്റെ ഓപ്പണ് ഫോറത്തില് സംസാരിക്കുകയായിരുന്നു അദ്ദേഹം. പ്രവര്ത്തകരുടെ ചോദ്യങ്ങള്ക്ക് മറുപടി പറയവെയാണ് തളിപ്പറമ്പിലെ സ്ഥാനാര്ത്ഥിത്വത്തില് പരോക്ഷ വിമര്ശനം ഉന്നയിച്ചത്. തദ്ദേശ തെരഞ്ഞെടുപ്പില് കുടുംബാംഗങ്ങള് മത്സരിച്ച ഇടങ്ങളിലെല്ലാം ജനങ്ങള് അവരെ തിരഞ്ഞുപിടിച്ച് തോല്പ്പിച്ചിട്ടുണ്ടെന്ന് പാര്ട്ടി വിലയിരുത്തി റിപ്പോര്ട്ട് ചെയ്തിരുന്നു. എന്നിട്ടും നിയമസഭാ തിരഞ്ഞെടുപ്പില് എന്തുകൊണ്ട് ഇത് ആവര്ത്തിച്ചു. മുന്നിര നേതാക്കളുടെ കുടുംബാംഗങ്ങളെ മത്സരിപ്പിക്കുകയും തോല്പ്പിക്കുകയും ചെയ്തു. തെറ്റുതിരുത്തല് പ്രക്രിയ വെറും ചടങ്ങായി പാര്ട്ടി മാറ്റരുത്. എന്നതായിരുന്നു ചോദ്യം.
ഇതിനകത്ത് രണ്ടു കാര്യങ്ങളാണ് ഉള്ളതെന്ന് മറുപടിയായി എംഎ ബേബി പറഞ്ഞു. പാര്ട്ടിയിലുള്ള ഏതൊരാളും പാര്ട്ടിയില് തന്നെയുള്ളവരുടെ മകളോ, മകനോ, സഹോദരനോ, സഹോദരിയോ, ഭാര്യയോ, ഭര്ത്താവോ ആകാം. ചിലര് അവരുടെ അര്ഹത കൊണ്ട് സ്ഥാനാര്ത്ഥിയാകുമ്പോള് അവരുടെ ബന്ധുത്വം പറഞ്ഞ് ബൂര്ഷ്വാ മാധ്യമങ്ങള് കടന്നാക്രമിക്കും. അതിന്റെ പിന്നാലെ നമ്മള് പോകാന് പാടില്ല.
