തിരുവല്ല : തെങ്ങുകയറ്റത്തിനിടെ പ്രവർത്തനരഹിതമായ യന്ത്രവുമായി കുടുങ്ങിക്കിടന്ന തൊഴിലാളിയെ അഗ്നിരക്ഷാ സേനയെത്തി രക്ഷപ്പെടുത്തി. കറ്റോട് കാരിമല വലിയകാലായിൽ ടി.കെ കൃഷ്ണൻകുട്ടിയെയാണ്‌ (65) രക്ഷിച്ചത്. വെള്ളിയാഴ്ച ഒരുമണിയോടെ ഇരുവെള്ളിപ്പറ കിടങ്ങേറ്റിപറമ്പിൽ വസ്തുവിൽ തേങ്ങയിടുന്നതിനിടെയാണ് സംഭവം. ചവുട്ടി ഉപയോഗിക്കുന്ന യന്ത്രം ഉപയോഗിച്ചാണ് കൃഷ്ണൻകുട്ടി തെങ്ങിൽ കയറിയത്. തെങ്ങിന് മുകളിലെത്തുന്നതിന് തൊട്ടുമുമ്പ് കമ്പികുരുങ്ങി യന്ത്രം നിലച്ചു.
താഴോട്ടും മുകളിലോട്ടും പോകാത്തനിലയിലായി. യന്ത്രത്തിൽനിന്നും പുറത്തുകടക്കാനുമാവില്ല. തടിയിൽ കൈചുറ്റിപ്പിടിച്ച് അരമണിക്കൂറിലേറെ കൃഷ്ണൻകുട്ടി നിന്നു. നിലവിളി കേട്ടാണ് ഉടമസ്ഥരുൾപ്പടെ എത്തിയത്. തുടർന്ന് അഗ്നിരക്ഷാസേന ഓഫീസിൽ അറിയിച്ചു. അഗ്നിരക്ഷാസേന ഓഫീസർ കെ.ശ്യാം കുമാറിന്റെ നേതൃത്വത്തിൽ എത്തിയ സംഘം കൂറ്റൻ ഏണി വഴി തൊഴിലാളിയെ താഴെയിറക്കി.
