തിരുവനന്തപുരം : ദേശീയ പണിമുടക്കില് യാത്ര തടസ്സപ്പെട്ടതിന് പിന്നാലെ മജിസ്ട്രേറ്റ് സര്ക്കിള് സ്റ്റേഷന് ഹൗസ് ഓഫീസറെ വിളിച്ചു വരുത്തി വിശദീകരണംതേടി. പേട്ട സ്റ്റേഷന് ഹൗസ് ഓഫീസറെയാണ് മജിസ്ട്രേറ്റ് ചേംബറില് വിളിച്ചു വരുത്തി ശാസിച്ചത്. ഓഫീസര് മാപ്പപേക്ഷിച്ചതോടെ പോകാന് അനുവദിച്ചു. പേട്ടയില് വെച്ചാണ് വഞ്ചിയൂര് ഒന്നാം ക്ലാസ് മജിസ്ട്രേറ്റായ അനീസയുടെ യാത്ര തടസ്സപ്പെട്ടത്. ചാക്ക-പേട്ട റോഡില് പോലീസ് തന്നെ കയര് കെട്ടി വാഹനം തടയുകയും സമരാനുകൂലികള് പ്രകടനം നടത്തി ഗതാഗതം തടസ്സപ്പെടുത്തുകയും ചെയ്തതോടെ വഞ്ചിയൂര് കോടതിയില് പോകാനായി എത്തിയ മജിസ്ട്രേറ്റിന്റെ യാത്ര തടസ്സപ്പെടുകയായിരുന്നു.
പ്രകടനം നടക്കുന്നതിനാല് ഈഞ്ചക്കല് വഴി വഞ്ചിയൂരിലേക്ക് പോകണമെന്ന് പോലീസ് ആവശ്യപ്പെട്ടെങ്കിലും പേട്ട വഴി മാത്രമേ പോകൂവെന്ന് മജിസ്ട്രേറ്റ് പറഞ്ഞു. മജിസ്ട്രേറ്റിന്റെ വാഹനം സമരക്കാര് തടഞ്ഞില്ലെങ്കിലും ഗതാഗതം തടസ്സപ്പെട്ടതോടെ മജിസ്ട്രേറ്റ് കോടതിയില് വൈകിയാണ് എത്തിയത്. തുടര്ന്ന് സ്റ്റേഷന് ഹൗസ് ഓഫീസര് റിയാസ് രാജയോട് മജിസ്ട്രേറ്റ് വിശദീകരണം തേടുകയായിരുന്നു.
സമരക്കാര്ക്ക് സഹായം ഒരുക്കാനാണോ പോലീസ് നില്ക്കുന്നതെന്നും ഗതാഗതം സുഗമമാക്കുകയാണ് പോലീസിന്റെ ദൗത്യമെന്നും പറഞ്ഞതോടെ സ്റ്റേഷന് ഹൗസ് ഓഫീസര് നേരിട്ട് ചേംബറിലെത്തുകയായിരുന്നു. വാഹനങ്ങള് തടഞ്ഞതിനും പൊതുനിരത്തില് സമരം നടത്തിയതിനും സിപിഎം പ്രവര്ത്തകരടക്കം 13 പേര്ക്കെതിരെ കേസ് എടുത്തിട്ടുണ്ടെന്നും ഓഫീസര് അറിയിച്ചതോടെയാണ് മജിസ്ട്രേറ്റ് ഓഫീസറെ പോകാന് അനുവദിച്ചതെന്നാണ് വിവരം.
