മലപ്പുറം: ന്യൂസിലാന്ഡില് ജോലി നല്കാമെന്ന് വാഗ്ദാനം നല്കി ലക്ഷങ്ങളുടെ തട്ടിപ്പ് നടത്തിയ രണ്ടുപേര് പിടിയില്. മലപ്പുറം വള്ളിക്കുന്ന് അത്താണിക്കല് സ്വദേശി യുവാവില് നിന്നും രണ്ടര ലക്ഷം രൂപ തട്ടിയെടുത്ത രണ്ടുപേരെ പരപ്പനങ്ങാടി പോലീസ് അറസ്റ്റ് ചെയ്തു. കാസര്കോട് മാലോത്ത് സ്വദേശിയായ കൊന്നക്കാട് കുന്നോലാ വീട്ടില് സ്കറിയയുടെ മകന് ബിജേഷ് സ്കറിയ (30), ചെന്നൈ സ്വദേശിയായ പൊന്നമള്ളി തിരുവള്ളൂര് പി ജി പി സ്ട്രീറ്റില് താമസിക്കുന്ന സയ്യിദലിയുടെ മകന് മുഹമ്മദ് മുഹൈദ്ദീന് (39) എന്നിവരെയാണ് പിടികൂടിയത്.
സോഷ്യല് മീഡിയ പ്ലാറ്റ്ഫോമുകളായ ഫേസ്ബുക്കും ഇന്സ്റ്റ ഗ്രാമും ഉപയോഗിച്ചുകൊണ്ട് പരസ്യം നല്കിയായിരുന്നു തട്ടിപ്പ് നടത്തി വന്നിരുന്നത്. കാസര്ഗോഡ് സ്വദേശിയായ ബിജേഷ് സ്കറിയ ആണ് ഇവരില് നിന്നും പണം കൈപ്പറ്റിയിട്ടുള്ളത്. എന്നാല് നാളേറെ കഴിഞ്ഞിട്ടും ജോലി മാത്രം ലഭിച്ചില്ല. ഇതോടെയാണ് തട്ടിപ്പിനിരയായെന്ന് പരാതിക്കാരന് മനസിലായത്. പിന്നാലെ പോലീസില് പരാതി നല്കുകയായിരുന്നു.
