തിരുവനന്തപുരം: മലയാള സിനിമയിലെ ലഹരി ഉപയോഗവുമായി ബന്ധപ്പെട്ട് രാസലഹരി ഉള്പ്പെടെയുള്ളവ ഉപയോഗിക്കുന്നവരുടെ വിവരങ്ങള് പോലീസും എക്സൈസും ശേഖരിച്ചെങ്കിലും നടപടിയെടുക്കാനാകുന്നില്ല. പ്രമുഖ നടീനടന്മാരടക്കം പത്തോളം പേരുടെ വിവരങ്ങളാണ് എക്സൈസിന്റെ വിവിധ സംഘങ്ങള് ശേഖരിച്ചത്. എന്നാല് സിനിമാ മേഖലയില്നിന്ന് ആവശ്യമായ സഹകരണം ലഭിക്കാത്തതിനാല് പരിശോധന നടത്താനാകുന്നില്ലെന്ന് ഉദ്യോഗസ്ഥര് പറയുന്നു. എറണാകുളം ജില്ലയിലുള്ളവരാണ് രാസലഹരി ഉപയോഗത്തില് മുന്നിലെന്നാണ് എക്സൈസ് കണ്ടെത്തല്.
സിനിമാ സെറ്റുകളില് രാസലഹരി ഉപയോഗം വര്ധിക്കുന്നതായുള്ള ആക്ഷേപം ഉയര്ന്നതിനെ തുടര്ന്നാണ് എക്സൈസ് സംഘം നിരീക്ഷണം ആരംഭിച്ചത്. സിനിമയുടെ വിവിധ മേഖലകളില് താഴേത്തട്ടില് പ്രവര്ത്തിക്കുന്നവരാണ് സെറ്റുകളിലേക്ക് ലഹരി എത്തിക്കുന്നതിലെ പ്രധാന കണ്ണിയെന്നു മനസിലായി. സൈറ്റുകളില് പരിശോധന നടത്തുന്നതിന് പോലീസിനും എക്സൈസിനും പരിമിതികളുണ്ട്. കൃത്യമായ വിവരങ്ങളുടെ അടിസ്ഥാനത്തില് പരിശോധന നടത്തിയാലും ലഹരിമരുന്ന് കണ്ടെടുക്കാനായില്ലെങ്കില് പ്രതിഷേധം ഉയരുമെന്ന് ഉദ്യോഗസ്ഥര് പറയുന്നു.
