വാഷിംഗ്ടണ്: 13 വയസിന് താഴെയുള്ളവര്ക്ക് സമൂഹ മാധ്യമം ഉപയോഗിക്കുന്നതിന് നിയന്ത്രണമേര്പ്പെടുത്താന് യു.എസ്. ഫേസ്ബുക്ക്, ഇന്സ്റ്റാഗ്രാം, ടിക് ടോക്ക് തുടങ്ങിയ സമൂഹ മാധ്യമ ആപ്പുകള് ഉപയോഗിക്കുന്നതില് നിന്ന് 13 വയസ്സിന് താഴെയുള്ളവരെ തടയുന്ന ബില് കൊണ്ടുവരുന്നതായാണ് റിപ്പോര്ട്ട്. 18 വയസിന് താഴെയുള്ളവര് അക്കൗണ്ടുകള് സൃഷ്ടിക്കുന്നതിന് മുമ്പ് ടെക് കമ്പനികള് മാതാപിതാക്കളുടെ സമ്മതം വാങ്ങേണ്ടതുണ്ടെന്നും സമൂഹ മാധ്യമങ്ങളിലെ പ്രശ്നങ്ങളില്നിന്ന് കുട്ടികളെ സംരക്ഷിക്കുന്നതിനായുള്ള ബില് നിര്ദ്ദേശിക്കുന്നു.
സാമൂഹിക മാധ്യമങ്ങള് സൃഷ്ടിക്കുന്ന മാനസികാരോഗ്യ പ്രതിസന്ധി പരിഹരിക്കാനാണ് ബില്ലിലൂടെ ശ്രമിക്കുന്നത്. കൗമാരക്കാരുടെ സ്വകാര്യ വിവരങ്ങള് ഉപയോഗിച്ച് അവരെ ഉള്ളടക്കത്തിലൂടെയോ അല്ലെങ്കില് പരസ്യത്തിലൂടെയോ ടാര്ഗെറ്റുചെയ്യുന്നതില്നിന്ന് കമ്പനികളെ വിലക്കും. 57 ശതമാനം ഹൈസ്കൂള് വിദ്യാര്ഥിനികളും 29 ശതമാനം ഹൈസ്കൂള് വിദ്യാര്ഥികളും ദുഃഖമോ നിരാശയോ അനുഭവിക്കുന്നതായി 2021ല് സെന്റര് ഫോര് ഡിസീസ് കണ്ട്രോള് ആന്ഡ് പ്രിവന്ഷന്സ് നടത്തിയ സര്വേയില് കണ്ടെത്തിയിരുന്നു.