റിയാദ്: എറണാകുളം സ്വദേശിയെ റിയാദിലെ താമസസ്ഥലത്ത് മരിച്ച നിലയില് കണ്ടെത്തി. താപ്പുംപടി കല്ലിങ്ങല് വീട്ടില് പോള്സണ് (56) ആണ് റിയാദ് മന്ഫുഅയിലെ താമസസ്ഥലത്ത് മരിച്ചത്. ഇക്കഴിഞ്ഞ ഞായറാഴ്ച രാവിലെ 11-ന് സൗദി എയര്ലൈന്സ് വിമാനത്തില് നാട്ടില് പോകാന് ടിക്കറ്റ് എടുത്തിരുന്നതാണ്. അന്ന് രാവിലെ സുഹൃത്തുക്കള് മുറിയിലെത്തിയപ്പോഴാണ് കിടക്കയില് മരിച്ച നിലയില് കണ്ടത്.
പ്രമേഹരോഗ ബാധിതനായ പോള്സണ് അവധിക്ക് നാട്ടില് പോയിട്ട് 10 ദിവസം മുമ്പാണ് റിയാദില് തിരിച്ചെത്തിയത്. എന്നാല് രോഗം മൂര്ച്ഛിച്ചതിനാല് വിദഗ്ധ ചികിത്സക്കായി വീണ്ടും നാട്ടില് പോകാന് തീരുമാനിക്കുകയായിരുന്നു. മൃതദേഹം അവിടെ മോര്ച്ചറിയില് സൂക്ഷിച്ചിരിക്കുകയാണ്. ഭാര്യ – റൂബി, മക്കള് – അയോണ, അലന.