തിരുവനന്തപുരം: വിവാഹ അവധികഴിഞ്ഞ് ലഡാക്കിലേക്ക് പോയ മലയാളി സൈനികനെ മരിച്ച നിലയില് കണ്ടെത്തി. പുല്ലുവിള ചെമ്പകരാമന്തുറ പീരുപ്പിള്ള വിളാകത്ത് ശിലുവയ്യന്റെയും ബെല്ലര്മിയുടെയും മകന് സാംസണ് ശിലുവയ്യനെ (28) ആണ് ബുധനാഴ്ച്ച പുലര്ച്ചെ മരിച്ച നിലയില് കണ്ടെത്തിയതായി ബന്ധുക്കള്ക്ക് വിവരം ലഭിച്ചത്. കഴിഞ്ഞ ദിവസം രാവിലെ പത്തരയോടെയാണ് ലഡാക്കിലെ പട്ടാള ക്യാംപില് നിന്നും അധികൃതര് വിവരം അറിയിച്ചത്.
പിന്നീട് പലതവണ ബന്ധപ്പെട്ട് വിവരങ്ങള് ആരാഞ്ഞിട്ടും അവര് വ്യക്തമായി ഒന്നും പറയുന്നില്ലെന്നുമാണ് ബന്ധുക്കള് പറയുന്നത്. മൂന്നുമാസം മുന്പായിരുന്നു സാംസണിന്റെ വിവാഹം. ബീനയാണ് ഭാര്യ. ചൊവ്വാഴ്ച്ച രാത്രിയിലും ഭാര്യയെയും ബന്ധുക്കളെയും വീഡിയോ കോള് വിളിച്ച് സംസാരിച്ചിരുന്നു. സാംസന് ജീവനൊടുക്കുകയായിരുന്നുവെന്നാണ് അധികൃതര് അറിയിച്ചതെന്നാണ് ബന്ധുക്കള് പറയുന്നത്. എന്നാല് ജീവനൊടുക്കാന് വേണ്ട യാതൊരു സാഹചര്യവും ഉണ്ടായിരുന്നില്ലെന്ന് ബന്ധുക്കള് വ്യക്തമാക്കുന്നു.
