ഓയൂര്‍ : സര്‍ജിക്കല്‍ ബ്ലേഡ് ഉപയോഗിച്ച്‌ മകന്‍റെ കഴുത്തറുത്ത് കൊലപ്പെടുത്താന്‍ ശ്രമിച്ച പിതാവിനെ പൂയപ്പള്ളി പോലീസ് അറസ്റ്റ് ചെയ്തു. ഇളമാട് ചെറുവക്കല്‍ ഇളവൂര്‍ മുടിയന്നൂര്‍ പള്ളിക്ക് സമീപം ബിജുഭവനില്‍ ബിജുവാണ് പിടിയിലായത്. പത്താം ക്ലാസ് വിദ്യാര്‍ഥിയായ മകന്‍ രാവിലെ ഉറക്കമുണര്‍ന്ന് മുറിയില്‍ കസേരയില്‍ ഇരിക്കുന്ന സമയത്ത് പിറകിലൂടെ എത്തി തോളില്‍ പിടിച്ച്‌ സര്‍ജിക്കല്‍ ബ്ലേഡ് ഉപയോഗിച്ച്‌ കഴുത്തിന് വീശുകയായിരുന്നു. ഒഴിഞ്ഞ് മാറിയതിനാല്‍ മുറിവ് മാരകമായില്ല.
പിന്നീട് ഇയാള്‍ വീട്ടിലുള്ള മറ്റുള്ളവരോടും അക്രമസ്വഭാവം കാട്ടുകയും അസഭ്യം പറയുകയും ചെയ്തു. പരിക്കേറ്റ കുട്ടിയെ അയല്‍വാസികളാണ് കൊട്ടാരക്കര താലൂക്ക് ആശുപത്രിയില്‍ എത്തിച്ചത്. സ്ഥിരമായി മദ്യപിച്ച്‌ വീട്ടിലെത്തുന്ന ബിജു അസഭ്യം പറഞ്ഞ് ബഹളമുണ്ടാക്കുകയും കുട്ടികളെ ഓണ്‍ലൈന്‍ ക്ലാസില്‍ പങ്കെടുക്കാന്‍ അനുവദിക്കാറില്ലെന്നും പൂയപ്പള്ളി പോലീസില്‍ നല്‍കിയ പരാതിയില്‍ പറയുന്നു. സംഭവത്തിന് ശേഷം ഒളിവില്‍ പോയ ബിജുവിനെ പോലീസ് പിടികൂടി കോടതിയില്‍ ഹാജരാക്കി റിമാന്‍ഡ് ചെയ്തു.
